Jowai: Yow pynsñiawthooh paidbah chaphang ka kaam poisa poilaiñ wa i rukom krehkaam ki Bank, ka Reserve Bank of India (RBI), Shillong ynne ka sngi da pynman ko ya ka ‘Field Level Financial Awareness Event’ ha Ladmukhla Dorbar Hall, Mukhla kawa em hapoh Thadlaskein C&RD Block, West Jaintia Hills District. Kani ka yalang man ko kam kawi na ki thong ka RBI wow lai cha kiwa boon ki chnong ki thaw khamtam cha nongkyndong yow pynche paidbah kammon wow tip u pyllang poisa, u chim ram wei wow lait na i chah thok.
Ya ka yalang da wai da u Paoboi Gante, General Manager, Reserve Bank of India, Shillong uwa ha ki ktien wai phang yong da klam u chaphang ki Bank wa i yoh myntoi na ki.
Ki sahep ka RBI, Shillong lyngba ka PowerPoint Presentation da khana ki cha ki paidbah ya ki kaam ka RBI kawa pynlai ya ka kaam poisa poilaiñ hapoh ka ri wei da kyntu ki leh ya ki paidbah wow man ki kiwa husiar hawa yoh ki ya ki e-mail, SMS, ya kiwa phone na kibru samen hadooh ki Company thok wei kammon wow ujor pyrchah ya kiwa thok, da e sikai leh kammon wow tip kiwon toh ki poisa thok wei i rukom pynlai poisa katkam wa jook wa katni deiwa pynemkaam da ki UPI UPI, BHIM, USSD wa kiwi kiwi.
Ha kani ka yalang da em leh ka B. Blah, Block Development Officer, Thadlaskein Block, u N Kharluki, DDM, West Jaintia Hills NABARD, u Kharbuli LDM, West Jaintia Hills, kiwa mih khmat kiwi ki Bank wei da em kamwa 180 ngut ki paidbah wa wan emlang wa kytnhup ya ki warep, ki dkhot ki SHG, kiwa khayi wa ki manbei.
Ki sahep ka RBI da e khublei ki ya ka Dorbar Chnong wa ki shep ka Block, ki sahep kiwi ki Bank wa waroh kiwa emlang kiwa yarap pynman ya ka yalang ka wa jop.
Discussion about this post