Jowai: Kam chibynta wow lehkmen yaka National Voluntary Blood Donation Day, hajrong ka phang “Your Blood can Save a Life”, ynne ka sngi ka Rotary Club Jowai deiwa ya krehlang waka MACS kamjooh ka Blood Bank Civil Hospital, Jowai da pynman yaka e snam sñiawbha ha Blood Bank Civil Hospital, Jowai.
Chwa wow sdang ya i e snam da em leh ka yalang wa tbian heiwa ka Dr. P. Shylla Senior Medical & Health Officer I/c Blood Bank Jowai, da pynche ko ya i kordor i snam neibhah ye ko wow pynim ya kiwa emkaam snam, wei e i snam man ko kawi na ki laad wow e yarap ya kiwi wei man ko leh ka e sñiawbha kawa kordor dooh.
Ha i jooh i por da pynche ko leh hajrong ki rukom e snam wa kynthup ya ki Voluntary Blood Donor, Replacement Donor wa ki Professional Donor. Napyrdi kini, ki Professional Donor toh kiwa chim da ka poisa wow e snam, ini pynyoo wa nalor wa ki chim poisa ki, da man ko leh ka chim kabu ya kiwa chitom wa kjut wa emkaam yarap.
Da pyntip ko leh wa ka snam wa yoh na kiwa kam kini ki bru toh u syndong bha neibhah wa boon ki por toh kiwa em kjut wa boon jait, i daw wa kam kini ki bru toh kiwa kyrni haka dih pynmuaid waphær wei im ki heitæ i rukom wa ym em miat.
Katkam ka rukom hi hadien 3 bnai de ye wow e snam biang tangwa kini won du wow yoh poisa, khlem da toh por da wan biang ki. Kamtæ ini u ktah ko ym du yaka chait ka khiah yong ki kamjooh leh yaka snam wa e ki.
Kiwi dei kiwa e yei klam kynthup ya u Rtn. J.M. Pohsngap President Rotary Club Jowai, u Rtn. Rudolf E. Laloo (PHF) Secretary, Dr. B. Dkhar naka Dr. Norman Tunnel Hospital Jowai, wa kiwi kiwi de.
Discussion about this post