Jowai: Ka Rotary Club Jowai kam chibynta i pyndep ya ki kaam katkam wa kdar luti ka Rotary International ha kani sngi Pyngkat 19 tarik Naikhynde 2020 da pynman ko ya ka Shiksha Samman 2020 waman kawi na ki thong krehkaam wada mang kyrpang heiyatoh wow kyntu kynrong yei purae puthi, kam hei wow yarap ya ki khynnah wa wan na ki manyung wa ban i dooh i duk, i pyndoohjait yei em ki khynnah wym lai skur wa kiwi kiwi.
Ha uni u snem hapyrdi i tynjooh ka khlam COVID-19 ka Rotary Club Jowai da pynman ko yaka Shiksha Samman 2020 deiwa pynkup burom ya ka Dr. Rihunki Jones Toi, Principal Jaiñtia Higher Secondary School, Jowai waman kawi na kiwa sikai wa e yei por wa kordor hei wow tyoor u saiñdur saiñdar ya ki khynnah wei wow pait u pynlai ya ka skur wa man ka chlem sikai wow e ka charak i che yong i stat i tip hapyrdi ki khynnah wa wan na ki chnong ki thaw waphær yong ka District.
Ya ka yalang pynkup burom da pynman ha Infinity Hall, Mooralong chirrup i emlang ki dkhot ka Rotary Club Jowai wa u B.D.Marak, Superintendent of Police, West Jaiñtia Hills District kam u kongsan.
U Rt. S.K. Lato (MPHF) President Rotary Club Jowai kam u chongkor yong kani ka yalang da khana u i parom watbian chaphang ka Rotary International wei da pachat u leh ki kyntien yahkhmat heiyatoh wa ka thong yong kani ka prokram neitæ kiwi ki dkhot ka seiñ kiwa da embyntalang ha kani ka yalang toh u Rtn. D.F. Majaw (PHF) Charter Member, ka Rtn. S. Tariang (MPHF) Chairperson Literacy, u Rtn. S.Laloo, Secretary Rotary Club Jowai wa ka Rtn. Ester F. Gatphoh, Charter President.
Ka Dr. Rihunki Jones Toi hawa klam neibynta i burom wa da yoh ha ka Shiksha Samman yong uni u snem, da e ko i sñiawngooh wa khroo ya ka Rotary Club Jowai, ya kiwa sikai kiwa da yah luti wei e mynsien ya ka na ki por cha ki por wei da ong ko leh i kaam sikai toh i kaam wa em burom neibhah lyngba kani ka luti ye ko u embynta wa ki khynnah ha kiwa boon ki kaam kiwa man ka laad ka luti wow yoh u saiñdur saiñdar ya ka mynried ka mankawi ka yong ki.
U B.D. Marak, Superintendent of Police hawa e yei klam da kitbok kitrwiang u ya ka Dr. Rihunki Jones Toi wa ya ka Rotary Club Jowai yow nang ye chooh chooh ki u leh ya ki kaam wa miat wa bha ha ka imlang sahlang yong ki bru wa chong chnong. Kam u bru wa embynta hei kaam sikai ha ki por wa dalai, da ong u kam wa yaphær i hei dur ha ki khynnah leh em ki jar jiar i long i man næ i pyrkhat pyrdaiñ, hanla kattæ leh chong won ha kiwa sikai wow tip kammon u leh yow yoh ki khynnah yei wamiat wabha tam. Chwa wow chong, e u leh ka khubor cha kiwa sikai deiwa ong, kynmoo kiwa sikai wa stat wa chemphang toh kitu kiwa sikai wa ye u tyoor u yah luti ya ki khynnah kiwa duna næ kiwa rap chadien hei puræ puthi yong ki.
