Ka Rotary Club of Orchid City Shillong da pynman ko ya ka thung dieñ hajrong ka phang “Thung Dieng: For a Green & Sustainable Future” ha Mairang ynnin ka sngi kam chibynta wow pdiang ya ka Rotary Year 2022-23 wei da thung hadoh 100 tylli ki tre dieñ heiwa u W. Nongsiej, Deputy Commissioner, da man u kam u kongsan hei emlang u A. Nongbri, ADC.
U Nongsiej da e khublei u ya ka Club wa da chimkhia ko wow thung ya kini ki tre dieñ heiwa daw sumaar ya ki hadooh wa heh ki deiwa ong leh wa ka Eastern West Khasi Hills District toh kawa yirngam bha wei emkaam wow kreh chirup wow yada ya ka.
U Rtn. (Prof.) Devesh Walia, uwa da chimkti kam u President ka Club da e khublei u ya u Deputy Commissioner wa da kyrchaan ki ya ki.
Da ong u wa ka thong yong u snem 2022-23 yong ka Rotary u man ko ‘Imagine Rotary’.
U Rtn. Vivek Kumar, Vice-President ka Club da ong u wa i yada ya ka rymaw toh i kaamram yong waroh ki bru deiwa pynkynmoo wa em du kawi ka pyrthai wei toh i kaamram yong uwi pa uwi wow pynneh ya ka.
U Rtn. Bedarius Shylla won da e khublei u ya ka yung krehkaam u Deputy Commissioner wei da kyrmen u yei yakrehlang neibynta ka District.
