Ka Dorbar Pyllun yong ka chnong Sahsniang wa kynthup ya waroh ar tylli ki chnong, da yoh ki wow chong pyrkhat kaam ynne ka sngi hajrong i thmu wow wanrah yei chongsuk chong saaiñ hapoh u pood u ang yong ka chnong hadien wa mih i kulmar.
Ya kani ka dorbar da pynlai da u Poimon Laloo, Waheh Chnong Sahsniang Saitthad wei da yoh yei klam na u D. Ymbon, Waheh Chnong Sahsniang-A, u Rev. E.C.H Passah, u Gilbert Sten wa u Habahun Dkhar, MDC ka 13-Saphai Constituency wei da wan wow sakhi leh ya kani ka dorbar da ki bor District ka West Jaiñtia Hills wa kynthup ya u W.K. Kharlukhi, MCS, Executive Magistrate wa u J.M. Sangma, DSP (Law & Order).
Ha kani ka dorbar da kyntu joor ya ki paidbah wa ymtoh wow klam pynmong næ pynsñiawsih ya uwon uwon wei khamtam ya kitu ki manyung mansem kiwa da chah ktah lyngba i mih i kulmar wei lada em kam kitæ, ka dorbar chnong daw chimkti ko ya kam kitai ki bru yow e kti ya ki cha ki bor yong ka aiñ.
Ha kani ka sngi, ka Dorbar Chnong Pyllun da rai wow kyrpaad ya u Deputy Commissioner wow sñiawbha u pyndam noh yei pynkrehkaam ya ka Curfew hapoh ka chnong Sahsniang (A wa B) neibhah wa da toh i por wow man skur noh ki khynnah, wei ki paidbah u yoh ki wow lai khih wei wow pynkreh ya ka MGNREGS wa kiwi kiwi wei lada dang em iwon iwon i kulmar hapoh chnong, ka Executive Committee daw chim ko yei bahkhlieh wei ka dorbar da rai ko leh wa ki ar tylli ki Executive Committee chnong daw lai ya syllok ki ya ki yung kiwa da maad yei sñiawsih.
Ka kyrwoh na u Firstborn Kamar, Secretary Joint Committee, Sahsniang-A wa Sahsniang-B.
