Ka Seiñ Khynroo Khyllood Katholik Good Shepherd Parish Ladrymbai, Jowai Diocese ha ka 26 wa 27 tarik uni u bnai hapoh i yahkhmat u Ripos Lyngdoh kam u President wa u Wellson R D Siangshai kam u General Secretary wot hapyrdi i pynthut u slap ka la-ær da pynman ki ya ka yaseiñ yalap wa chisien chisnem ha ka Balang Chnong Mutong-Musnait hajrong ka phang: “Don lai tylli kiei kiei kiba sah-duh: ka Jingngeit, ka Jingkyrmen bad ka Jingieid” – 1 Kor 13:13.
Ha ka sngi sdang da da em ka Mass Wakhooid wa leh da u Spiritual Youth Director Rev. Fr. Ebormitre H Lamare uwa man leh u Assistant Parish Priest wei deiwa emlang u Parish Priest Rev. Fr. Aibor D Nangbah.
Ha kani ka yaseiñ da yoh i yaklam wa ki kyntien yalap na ka Sister Mary Concepta kam ka Resource Person hajrong ka phang “I Ngait”.
Ha ka sngi u Blai da pynkut da ka Mass Wakhooid, ka mane Sacrament wa ka yalap sneiñ kroo na u Rev. Fr. Ebormitre H Lamare.
Ha kani ka yaseiñ yalap da wan chimbynta da ki khynroo na 24 tylli ki Balang chnong wa haap ha ka Parish Ladrymbai kiwa da em duna 200 ngut.
Da ya synranlang wei e mynsien chooh chooh ya ki khon khynroo da ki Sister, Head Catechist, kiwa yahkhmat Balang ki rangbah ki manbei wa ki diah khian.
Da pynphooh pynphieñ ya kani ka yaseiñ yalap da ki rwai wa ki chaad wei da e khublei sñiawngooh na u Wellson R D Siangshai wei da pynhaap ya ka lama ka seiñ da u Spiritual Youth Director.
