Ka All Jaintia Muster Roll Workers & Labour Union (seiñ bei) Jowai, chirup wa i yakrehlang wa ka Dorbar Chong Loomiongkjam wa ka A. Pariat kawa pait ya ka Common Service Centre ha West Jaiñtia Hills District da pynman ki ya ka yalang pynsñiawthooh wa i pynpsiah pyrtuid ha ka e-SHRAM ka Scheme yong ka sorkar India lyngba ka Ministry of Labour neibynta wow tipmit ya ki wakreh mylla.
Ya ka yalang pynsñiawthooh da pynlai da u Khroo L Pariat, President ka All Jaiñtia Muster Roll Workers & Labour Union kamjooh uwa da batai bniah hajrong ka e-SHRAM Scheme heiwa da khana u wa neiliang yong ka seiñ da lai pynman yalang ko ha kiwa boon ki chnong ka Ri Jaiñtia neibynta ki wakreh mylla kiwa yoh nongsngi hapoh T. 15,000 chi bnai. Da kyntu u ya waroh ki wakreh mylla wow pynpsiah pyrtuid ha kani ka e-SHRAM Scheme neibynta u chngaaiñ i im lyngba i yarap ka sorkar India lyngba kani ka Scheme.
Ka Ameecia Pariat da batai bniah chooh chooh ko ya kani ka Scheme khamtam ki kot kam ka Aadhaar, ka Bank Passbook wa ka EPIC kiwa emkaam neibynta u pynpsiah pyrtuid ha kani ka e-SHRAM.
Kiwa mylla kiwa da dep pynpsiah pyrtuid ha kani ka sngi na Loomiongkjam da em ki 20 ngut donhi.
Neibynta yow yoh myntoi ki wakreh mylla, neiliang ka seiñ daw pynman ko kam kani ka jooh ka yalang pynpsiah pyrtuid ha ka e-SHRAM ha ki chnong ha Ri Jaiñtia.
Ha kani ka yalang da emlang ka Banaras Dhar, General Secretary, ka All Jaiñtia Muster Roll Workers & Labour Union ka East Jaintia Hills District Unit chirup wa u Jerry Suting, President ka All Jaiñtia MDM Workers Union wa ka Hunbeitki Dkhar, General Secretary, Jowai Unit.
