Pynman ka Seiñ Kur Dkhar West Jaiñtia Hills District ya ka 3rd Annual Meet

Ka Seiñ Kur Dkhar West Jaiñtia Hills District ha ka 6 tarik uni u bnai da pynman ko ya ka yachemlang wa le namo ka 3rd Annual Meet ha chnong Moodymmai.

Kani ka yachemlang man ko chibynta u ya tipmit para kur, u wanrah i yatylli hapoh ka kur wei wow yasneiñ kyntu neibynta i bha i miat ka seiñkur kamjooh i bha yong ki khon ka kur ha ki liang waphær waphær.

Ha ka yalang wa pynlai da u President ka Seiñ Kur Dkhar West Jaintia Hills District, u Jesse Dkhar, da yoh i sneiñ i kroo na ki waheh wasian ka kur wa kynthup na u Rolling Dkhar, Adviser Central body, u HC Dkhar, President Seiñ Kur Jaiñtia Hills, u Mothing Dkhar, u Barson Dkhar wa kiwi.

U Mothing Dkhar hawa klam ong u hawa em ha ka Seiñ Kur toh u leh iyi ræ iyi, ymtoh da ka kur wow leh ya i. Neitæ toh u man leh kiwa tip u jied iwon wa toh iwon iwon wa lait, najrong wow man leh ki khon wa yachimbynta ha ka kur ymhoi leh u randien ha ki kaam wa bha.

U Barson Dkhar da klam u heiyatoh wa ka kaam chongkha deiwa ong wa man ko kawa kyntang wa da saiñdur da u Blai, hawa chongkha emkaam i maya na doohnood ymtoh na jabieñ hi-eh.

Ym hoi u chongkha khleh chongkha sang neibhah ka jait bru Pnar yong i toh kawa kyrpang nadooh ka ktien ka thylliej ka riti ka dustur.

Toh u man leh kiwa tip kur tip kha tip akor burom, ym u man i bha i miat dur du ha ki rong donhi tangwa wot hei rukom man.

U Rolling Dkhar da klam u heiyatoh wa ka imlang sahlang hapoh ka kur wei da ban u hajrong i emkaam u man kiwa yinsur i thij pyrkhat ha iwon iwon i bynta wa ya takhooh la para kur ne wa kiwi tawon.

Toh u man kiwa kyrchaan kylliang para kur para jait, u man kiwa yamaap kylliang chan kylliang hei manbru longbru.

Neiliang u HC Dkhar won kyntu u wow syndong yei manbru dei wow man kiwa tip bru tip blai, tip kur tip kha wei u klam yei hok, najrong u man leh kiwa klam wei leh yei sakhiat.

Da kyntu u ya kiwa ksoh kaam ka kur ha waroh ki Unit wow kreh ki dei mynsien yatylli wei sñiawthooh yumut.