Ka Seiñ Kur Shylla Khasi Jaiñtia, ha ka 5 tarik uni u bnai da yoh ko wow pynman ya ka Dorbar Pyllun kawa soo ha ka chnong Byndihati, East Jaiñtia Hills District, heiwa da wan da ki hajar ngut ki dkhot ka kur na jan wa na jngai kiwa napoh Ri-loom Khasi Jaiñtia kamjooh leh ki dkhot yong ka kur kiwa chong wa sah hapoh ka jylla Assam kam ha Silchar.
Da ya emlang ha katai ka sngi wa u MLA ka thaaiñ u Kyrmen Shylla uwa man leh u Montri ka jylla kam u kongsan, hei emlang ka Santa Mary Shylla, ki Father, ki Pastor, ki Lyngdoh, u DM&HO ka East Jaiñtia, u Dr. Domenic Shylla, u BDO Wapung C&RD Block, u Dr. Tammiyaki Shylla, u Waheh Chnong ka Byndihati wa kiwi de.
Ya kani ka yalang da pynlai da u President Rangbah ka kur, u Pyrkhat Shylla, heiwa da pynhær leh ya ka lama yong ka kur ha chwa wow sdang ka yalang wei da e leh ya ka Financial Reports wa Annual Report da u General Secretary, u Eastenius Shylla wei da pynlait paidbah ya ka Calendar yong ka kur da u Kyrmen Shylla.
Hadien ini da pyntipmit wei pynskhem ya ka seiñ khynroo ka kur wei da yoh leh yei klam na kiwa mihkhmat na ki District yong ka West Jaiñtia Hills, South West Khasi wa East Khasi Hills District.
U kongsan hawa e yei klam da ong u wa yow kyntu ya ka burom yong ka kur toh du dei ktien u thylliej wa em akor wei wow rah yei naam wei burom yong ka kur. Da kyntu u leh ya ki khon khynroo ka kur wym toh u man ki kiwa sarong lane kiwa leh heh wei wow burom ya kiwa da heh wei wow man kiwa chlur neibynta ki kaam wa bha.
Ka kur da pynkup burom ko leh ya u Edigio Paia Shylla uwa da poi haka kyrdan 16th Position ha ka Exam SSLC yong u snem 2022.
Da pynphooh pynphieñ chooh chooh ya kani ka sngi da ki chaad ki rwai kiwa da chimbynta da ki dkhot ka kur na East Jaiñtia, ki chaad tynre na ki dkhot ka kur na West Jaiñtia, ka Chaad Pastieh naka chnong Byndihati.
Hawa kut yong ka yalang, u kongsan da pynhiar u ya ka lama yong ka Seiñ Kur Shylla Khasi Jaiñtia.
