ka Seiñ Kur Swer Langstang Suiam ynne ka sngi da pynman ki ya i lai paidbah ha ka chnong Rtiang, West Jaiñtia Hills District kawa man ka chnong tre yong ka khon ka kur kawa chah pynyap dusmon ha chnong Sohkymphor wei kani ka lai paidbah leh man ko kam wow beiñ joor ya iwa jia ya kani ka khynnah skur kawa man leh ka khonswet.
Ini da jia i haka 16 tarik uni u bnai wei katkam wa pyntip kawa sikai kani ka khynnah toh sngi wa dang dep wot kani ka khynnah wow thoh Exam heiwa da yoh wow chong sngi haka 17 tarik wei ka sngi khaddooh wow pynman Exam toh haka 18 tarik.
Ha kani ka sngi da emlang leh ki khynnah skur, ki seiñ manbei, kiwa yahkhmat chnong, kiwa yahkhmat ka Seiñ Kur Swer Langstang Suiam, kiwa sikai, ka seiñ JSM, KSU Laskein Circle wa kiwi kiwi de.
Da ya rah leh ya ki kot-rben wa da em ki thoh wow beiñ joor ya iwa jia.
Ha kani ka sngi neiliang ka KSU da emlang u Balawan Suchiang, President ka KSU Laskein Circle, u Javeline Shadap Manner Organising Secy. KSU Laskein Circle, u Leningrad Tariang Organising Secy. KSU Jaiñtia Hills District Unit, kiwa yahkhmat ka Jaintia Student Movement wa kiwi kiwi.
U Balawan hawa e yei klam da ong u wa ha ri India ki kaam slaitbor da ku i katwa dang lai uwi u snem cha uwi wei i daw wa ku kini ki kaam toh wym em ki aiñ kiwa khlan wow pynchitom ya kiwa thombor ya ki khynnah kynthai.
“Ha u snem 2018 ki kaam slaitbor hapoh ka ri India waroh kawi da poi da palat 2 lak tam katwa ha u snem 2019 ki kaam chah slaitbor da poi ki palat 4 lak tam, ini pynyoo wa katwa dang mih ki sngi dang joor ki kaam slaitbor hapoh ka ri India,” da ong u Balawan deiwa pynrap wa na ini i daw emkaam jhan yaki aiñ kiwa khlan ki wow kdoh u khoom yei ku ki kaam thombor ya ki kynthai hapoh ka ri.
Ha kani ka sngi da yoh leh ya i klam na u Leningrad Tariang, u Shnalad Rymbai uwa yahkhmat ka JSM, kiwa sikai wa kiwi kiwi.
