Jowai: Ka Socio Economic Life Development (SELD) Barato Presbyterian District ha ka thong wow tip ki khon khynroo khyllood u saiñdur saiñdar yei long i man wa miat wabha kat dang toh i por wow pynlai yumut hei puræ puthi wa ha kiwi kiwi ki ksam chakri Blai kam ki khon ka Balang, ha kani ka sngi Mulong 14 tarik Naikhynde dachim ko wow khut pynman ya ka prokram pynche pynsñiawthooh hajrong ka phang wa ong “I ktah wei eh i kho wa mih nei chongkha chongman heirta wa dang khynnah”.
Ha kani ka sngi chwa wow sdang ya kani ka yalang pynsñiawthooh paidbah, da em ka yalang yahkhmat hei pynlai u H. Shadap kam u chongknor wei da kdar luti chooh chooh leh ya ki bynta wa chakhmat dei puræ ya ki kyntien na ka Bible da u Thijbok Lamare katwa u Daohi Manner, Secretary da e u ki kyntien yahkhmat wei kyntien kyrsu kyntu ya ki khon khynroo khyllood ka Balang.
Ka Dr. S.D. Wann, Medical & Health Officer, Laskein CHC kam ka bru stat, bru chemphang yong kani ka prokram, neibynta i myntoi ki khon khynroo khyllood da pynwandur ko yei klam yong ka deiwa ong, i chim ki khynnah næ ki khynroo khyllood yei kaam chongkha chongman hei rta wa dangkhian toh wanrah ko chiboon i tynjooh iwa ye u ktah yei chait i khiah yong ka bei kamjooh yei khonboo wei ki laad ki luti wa suk tam wow khriñ ya ki khynnah cha i chongkha chongman hei rta wa dang khynnah toh i daw yong i dooh i duk, i daw yong ka yung ka sem, i daw yong ka juk stat Technology næ Social Media, i daw yong i sah doom sahdien wa kiwi kiwi.
Kamtæ wow lait na kini ki rukom tynjooh katwa i por ym pu toh u chim ya ka lyngkor yong i manbei manpa, kyrsu kyntu ko ya ki khon khynroo khyllood wow man ki kiwa skem yurim hei longbru manbru dei wow chim leh ki laad ki luti wow em i tæ i sñiaw wa yajan wa ka bei u pa næ ki hayung hasem.
Khana chooh chooh ko leh ha ka ri India waroh kawi 40 percent na ka 100 ki bru chongkha ki hei rta wa dang khynnah katwa ha ka Jylla Meghalaya wan 60 percent na 100 em ki khynnah wa chonngkha hei rta wa dang khian, kamtæ emkaam bha ya ka Balang, ki bor pynlai chnong pynlai thaw wow chimkhia ki u leh næ pynman yakam kini ki prokram yaklam pynche pynsñiawthooh na ki por cha ki por kyrpang ya ki khynnah wa em ha pyrdi i rta wa 13 hadooh 20 snem wei deiwa leh kamni yooluti wa i em ki khynnah wa chongkha heirta wa dang khian u duna ki.
Ki khon khynroo khyllood kiwa da wan ya chimbynta ha kani ka prokram toh kynthup ki naka Balang Barato, Pdeinkarot, Pynthor, Maitdein, Iongkynshur, Mukroh, Umtasha, Saba wa na Lapangap.
Khaddooh chwa wow poi ka bynta wakut yong kani ka prokram neiliang u Pastor R.P. Lyngdoh booh pachat u ki kyntien e mysnien ya kiwa ya chimbynta neitæ won pynbood i duwai pynkut da u Tbn. O.S. Bareh.
Discussion about this post