Pynman ka Seng Kynthei Shnong Umkiang yei pynsñiawthooh hajrong i Drugs, i chongkha khynnah waka aiñ POCSO  

Ynnin ka sngi, ka Seng Kynthei Shnong Umkiang deiwa ya krehlang waka Umkiang Police Patrol Post da yoh ki u pynman yaka pynsñiawthooh paidbah hajrong i maa i pynemkaam Drugs kamjooh i ya chongkha dang khynnah wa i batai chaphang ka aiñ POCSO Act.

Ya ka yalang da pynman hapoh Dorbar Hall Chnong Umkiang heiwa ki bru chemphang (Resource Person) wa poi toh u Dr. J. Nongtdu uwa man leh kam uwa pait yaka Oral Substitution Therapy ha Khliehriat Civil Hospital heiwa da batai u yei maa yong i Drugs ym du ya kiwa pynemkaam tangwa yaka yung ka sem waka imlang sahlang hi waroh kawi. Da batai che u leh yei emkaam u kiar na waroh ki jait Drugs neibynta i bha i miat yong waroh.

Ka R. Kynjing kawa man leh ka District Child Protection Officer, Khliehriat da batai ko chaphang i maa wa i pynche hajrong i chongkha khynnah namo ka Child Marriage heiwa da ban joor ko yaki khynnah skur wa ki manbei wow kiar ki na i chongkha khynnah. 

U In-charge yong ka Umkiang Police Patrol Post, u D. Shabong da e hikai u chaphang ka aiñ Protection of Children from Sexual Offences (POCSO) Act deiwa ong wa kani ka aiñ toh kawa yarap yaki khynnah lada em wa chah jrongkti ki næ chah lehbeiñ ki heiyatoh i man kynthai yong ki ha kiwon kiwon ki bru wa chim kabu yei chida wei lui-lui yong ka rta yong ki kam ki khynnah. 

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha kani ka yalang pynsñiawthooh paidbah da emlang leh wa ki khynnah skur yong ka Holy Cross School Umkiang, ki dkhot Seng Samla Shnong Umkiang, kiwa sikai, ki manbei, ki khynroo kamjooh kiwi de kiwa chong chnong yong ka chnong Umkiang. 

Neiliang ka Seng Kynthei Shnong Umkiang e khublei ko ya waroh kiwa da chimbynta ha kani ka yalang neibynta u pynbha pynmiat yaka imlang sahlang yong ka chnong ka thaw. E khublei kyrpang ko leh ya ki Resource Person kiwa da yaleh chitom u poi cha Umkiang hapyrdi i sahkut kari ha tymbud sarok u NH-6 ha thaaiñ Narpuh. E khublei ko leh yaka Umkiang PPP wa da ya krehlang ki neibynta u lai bait kani ka yalang khamtam e khublei ko ya u waheh chnong ka Umkiang uwa da e laad ya ki yow pynman ki ya kani ka pynsñiawthooh paidbah kawa jop.