Ka Shangpung College da pynman ko ya ka “District Level Youth Festival of the Red Ribbon Club (Jaintia Hills Region)” ha ka 8 tarik uni u bnai ha Moolibang Community Hall, Shangpung. Kani ka yachemlang wa pynlai da ka Red Ribbon Club ka Shangpung College toh deiwa ya ksohktilang wa ka Meghalaya Aids Control Society, Shillong ha ka phang “Break the Stigma, Break the Silence, Break the Chain.”
Ka kongsan ha kani ka sngi toh ka Lisana Balsime R. Marak, MCS. Assistant Commissioner, West Jaintia Hills District, u Dr. Frankinstar R. Shadap, Block Development Office deiwa emlang ka Dr. Phaity Lamare, District Tuberculosis Officer cum District AIDS Control Officer (DACO), East & West Jaintia Hills, ki bru yong ka Meghalaya AIDS Control Society, Shillong, ka Larina Nongpuir, Assistant Director, Youth Affairs, u Ajoy M. Lanong, Deputy Director wa u Sandy Banroi Tariang, Cluster Program Manager chirup ki dkhot ka Governing Body yong ka Shanpung College, ka Synjuk ki Dorbar Chnong Shangpung wa u Principal ka Shangpung College.
Ha kani ka lehkmen da pdiang sñiawbha da u Principal ka College, u Dr. D.G. Lyngdoh ya kiwa chimbynta ha kani ka Youth Fest, ka Dr. P. Lamare da e ko i pynche yei roi u khñiang HIV/AIDS wei da yoh leh yei klam na ka kongsan wa u symbood kongsan.
Ki College kiwa chimbynta ha kani ka District Level Youth Festival toh ka Thomas Jones Synod College, ka Jaintia Eastern College, ka Nongtalang College, ka Don Bosco College, Byndihati wa ka Shangpung College kiwa da yaleh ha ki yakob waphær waphær nadooh ka Marathon, ka Quiz Competition wa ka Inter-College Self Composed Singing Competition.
Ha ka Inter College Marathon (Female Category) da jop nyngkong da ka Anidakashwa Shylla, Shangpung College, pynbood won sa ka Wadakini Suchiang, Thomas Jones Synod College hei wa ar katwa hei wa le da jop da ka Roibhaki Biam, Kiang Nangbah Government College. Ha ka Male Category won da yoh nyngkong da u Richel Khriam, Thomas Jones Synod College, hei wa ar da yoh u Apdameihi Niang, Thomas Jones Synod College katwa hei wa le da yoh u Tony Suting, Thomas Jones Synod College.
Ha ka Quiz Competition da jop ka Lummuro Secondary School, hei wa ar da jop ka Clear Water Secondary School wei hei wa le da jop da ka Shangpung RMSA Secondary School.
Ha ka Self-Composed Singing Competition da jop da ka Thomas Jones Synod College, hei wa ar da yoh ka Shangpung College wei wa le da yoh da ka Nongtalang College. Kiwa bichaar ha ka Inter College Singing Competition toh u Lyngkit Lyngdoh, u Da-oo Biang Langstang wa u Luckystar Lapasam.
Yei klam pynkut da yoh na u Emmitre Iakai uwa da e khublei ya waroh kiwa chimbynta.
Discussion about this post