Ka Sonapyrdi Tourism & Economic Development Society (STEDS) da yoh ko wow pyndep yei lai kjat namo ka Trekking cha u Loom Musliang kawa ar sngi kitæ ha ka 28 wa 29 tarik u November 2025 wei kani toh ka sien wa ar wa da pynman ya kani ka Trekking da kani ka Society.
Ha uni u snem da wan wow chimbynta wa u Principal ka Jaiñtia Eastern College, u Dr. P. Nongtdu deilang ki chynrang wa kynthai na ki chnong waphær kiwa em hapoh ka District wa na baar ka District leh kiwa em hapoh 30 ngut.
Uni u Loom Musliang toh uwa ye u chynna na u NH-6 wei waroh kiwa da chimbynta da ye ki wow poi hadooh ha khlieh loom.
Ka STEDS hapoh i yahkhmat u Kwilnis S Suchiang kam u President wa u Tackmon L Gympad kam u Secretary da pynsñiaw ki yei kmen wow yahkhmat ya kiwa da wan chimbynta waroh wei da e khublei ki leh ya chnat Wildlife Division wa da e bor ko ya ka Society wow pynman ya ka Trekking hapoh ka Narpuh Wildlife Sanctuary wei da sñiawngooh ki leh ya kiwa kreh kiwa da yahluti ya ki.
Ha ka sngi sdang wow lai luti, da sahmiet ha Umswang ha chiliang ka wah Lukha mar pyrchah ka chnong Sakhri deiwa chong da ki lieñ wei da sdang ya ka sngi wa ar heipor 7:30 i step heiwa kiwa lai kjat da yoh ki leh wow yoo ya chiboon iwa miat ka bei ramaw wei wow ap ya ki sur ki sim ki doh wa boon jait wei wow riñ mynsien leh ya ka la’ær wa khooid.
Hadooh wa poi ha khlieh loom da chimpor kamwa soo kynta chiteiñ wei da hiar liwan won da kawi ka luti yow poi hajan ka Sonapyrdi iwa da chimpor kamwa ar kynta chiteiñ hadooh le kynta.
Ini i lai Trekking ym em mut du wow ku loom tangwa yow sñiawthooh leh yei kordor i chait i khiah, ka ramaw rimchi, ki umbaam umdih, ki sim ki doh deiwa ye u pynneh pynsah ya ki dieñ ki siej kamjooh wow em i ya maya para bru khlem da sñiaw boon jait.
Discussion about this post