Ka Sonapyrdi Tourism & Economic Development Society (STEDS) da pynman ko yei lai kjat wei sah miet (Trekking/Camping) cha u Loom Bah Bo Bah Kong kawa da pynman nadooh ka 23 tarik uni u bnai wei da pynkut ha kani ka 25 tarik.
Da ya sah leh chi miet ha Keria kawa em hapoh ka Narpuh Wildlife Sanctuary wei chi miet won ha rood ka Wah Lukha iwa em chaneiñ ka chnong Khatdum iwa jngai 2 kynta deiwa lai kjat na Khatdum.
Ya ini waroh da leh deiwa yoh bor naka chnat Wildlife neidaw wa utai u loom em u hapoh ka Narpuh Wildlife Sanctuary wei da yahluti ya ini i lai kjat da kiwa kreh ka chnat Wildlife deiwa emlang u Chanborki Law uwa man u Ranger Officer, u M. Syrpuh, Beat Forest Officer, Sonapyrdi Beat wa ki kattu katni ki wakreh.
Kiwa ya chimbynta ha katai ka lai Trekking toh u Chibor Wahlang wa ki bru yong oo deiwa emlang u Dr. S. Momin, In-charge CHC, Khliehriat deilang wa kiwi ki waheh wa ki khynroo na ki chnong waphær waphær deiwa chimbynta 31 ngut.
I thmu yong ka Society hawa pynman ya katai ka Trekking toh yow yoo dei khmat ya uni u loom wa bna naam ha thaaiñ Narpuh wei kamjooh hapoh District hi waroh kawi. Ini man i leh kam chibynta wow pynchlur ya kiwi wow tipmit wei wow maya ya ka bei rym-aw, ki mrad ki mreng, ki sim ki doh wei wow pynneh pynsah yeiwa da e da uwa booh wa thaw wei heijooh i por yow yoh yei chait i khiah.
Ka Narpuh Wildlife Sanctuary toh kawa heh 59.9 Sq.Km ya kawa da tipmit da ka sorkar nadooh u snem 2014.
Neiliang u KS Suchiang, President ka Society wa u Tackmon L Gympad, Secretary da pynsñiaw ki yei kmen wei da e ngooh ya u Blai wa da ye u pynman ya kam kani ka Trekking deiwa pyndep ya ka katkam wa da thmu wei angnood.
Neiliang u Tackmon L Gympad da ong u wa ka Society u lai ko chakhmat wow pynman chooh chooh ya kam kani ka Trekking ha ki kattu katni tylli ki thaw wa pawnaam hapoh ka thaaiñ khnang wow thooh yow chem yeiwa em hapoh ka mariang.
Da e u leh yei yaroh yaka chnat Forest neibhah wa da yoo jngai ko wow pynneh pynsah yei rben kani ka khloo wa i em ki dieñbah dieñsan.
Discussion about this post