Pynman ka SURE ya ka esikai kammon wow chna sboh cha ki seiñ kynthai ka West Jaiñtia Hills

Ka Society for Urban and Rural Empowerment(SURE) da pynman ko ya ki esikai wow chna sboh namo ka Composting Training ha ki chnong waphær waphær ka Ri-loom Jaiñtia. 

Ha ka 14 tarik uni u bnai da pynman ya ka esikai hapoh ka Thadlaskein Block West Jaiñtia Hills District heiwa da wan chimbynta da kamwa 20 tylli ki Women SHG wei chwa kani ka esikai da em ka yalang wa tbian ya kawa da pynlai da ka Premri Pale kawa da yaroh ya ka yung krehkaam ka SURE wow wanrah ya kam kani ka esikai ka wow yoh myntoi ki warep.

Da yoh leh yei klam na ka President ka Village Organisation (VO Ialong ) ka Sngi Dhar kawa da pynsñiaw yei mynsien wa kmen neibhah wa da dap chi snem i lai luti ka VO ha kani ka sngi wei ha ka lyngkhooh snem da chah hiki ki dkhot yong ka waroh.

Chooh chooh da yoh yei klam na u Habandajop Lyngdoh hajrong kani ka esikai ya kawa da pynman dei kyrchaan na ka yung krehkaam District Social Welfare Officer deiwa ekhublei leh ya ka SURE wa da e ko ya ka seiñ kam kini ki esikai neibynta ki kynthai kammon wow chna sboh heiyatoh wa i rep i riang nadooh i Sbohwieh, Sboh-phlang, Sboh-khyndaw, Um-sboh jhoor, i rep tit wa kiwi kiwi. 

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha ka 17 tarik won da pynman yei esikai chna sboh chirup i krehlang wa ka District Social Welfare Officer West Jaiñtia Hills, ha Lumtrep Nongjngi, West Jaiñtia Hills District heiwa da wan chimbynta da ki kynthai na ka chnong. Chwa wow sdang ka esikai da em ka yalang ya kawa da pynlai da u Ebormi Pale (Waheh Chnong) uwa da pdiang sñiawbha.

Ha kani ka sngi da yoh yei klam na u P. Chyrmang uwa da klam hajrong i ktah i kiad wa ki rukom dih pynmuaid waphær waphær kawa ktah ya ka yung kamjooh leh ya ka chnong uwa da ong wa emkaam bha ya ki seiñ wow kreh ki pyrchah ya ini. 

Ka J. Synnah kawa man leh ka District Social Welfare Officer, West Jaiñtia Hills District da yaroh ko ya ka SURE kawa da jooh yarap bha ya ka yung krehkaam yong ka wei kawa da pynemkaam hok sakhiat ya ki Scheme sorkar. 

Ha kani ka sngi u H. Lyngdoh da man u kam u bru chemphang uwa da hikai hajrong ka phang Vermi Composting wa ka Bokashi Composting.