Ka Society for Urban and Rural Empowerment (SURE) da pynman ko yaka Youth Leadership Program kawa sdang nadooh ka 9 tarik uni u bnai haka chnong Samanong, kawa haap hapoh ka Amlarem Sub Division yong ka West Jaiñtia Hills District. Ki khynroo khyllood na kiwa boon tylli ki chnong napoh ka District da wan ki wow ya chimbynta ha kani ka program. Ya kani ka program da kyrchaan poisa daka Nehru Yuva Kendra Jowai heiwa ki khynroo kamjooh leh kiwa chong chnong da ya chimbynta chongchit ki.
U Saron Paswet MDC yong ka Jaiñtia Hills Autonomous District Council uwa man leh kam u kongsan ha katai ka sngi, ha i klam yong oo da yaroh u yaka seiñ kamjooh leh yaka chnong Samanong wa ye ki u pynman kam kani ka program neibynta ki khynroo khyllood. Da pynchlur u leh ya ki wow chimkhia ya iyi wada yoh sikai ki ha kani ka program. U MDC da pynsñiaw u yei sñiawkmen wow tip wa da sikai ym du wow chim yaka rai wei hawa wan i eh kammon wow jop yaki, wei da yoh ki leh yei sikai chaphang ki laad yoh kaam yoh jam haka mynried ka yong ki kawa man kawa emkaam hadooh kattæ kattæ ha kani ka juk duna kaam.
Haka sngi wa nyngkong ka program da sdang da ka yalang wai phang ya kawa da pynlai da ka Pasqualina Lamare kawa man ka Associate yong ka SURE wei pynbood sa ki kyntien pdiang sñiawbha na u Waheh Chnong yong ka chnong Samanong u Stanley Dkhar. Hadieng da yoh ya ki kyntien yahkhmat chaphang ka prokram na u Rev. H.H. Mohrmen uwa man u Secretary yong ka SURE uwa da batai kajiak chaphang ki program kiwa daw pynman ha kini ki sngi wei hadien neitæ da yoh ya i klam na ka Heipor Rasmut kawa man ka National Youth Volunteer yong ka Office Nehru Yuva Kendra.
Ka bynta wa nyngkong yong ka program da yoh sikai chaphang ka ‘Decision making & problem solving’ na ka Coriniki Slong kawa man ka Program Associate. Hadien ini da pynman sa kawi ka program ya kawa da tip kam ka Agro Biodiversity Walk heiwa ki khynroo da lai ki soodong ka chnong kamwa 7 Km lyngba ka khloo chnong leh. Ka thong yong ini toh wow yarap yaki khynnah khynroo wow tipmit ya ki jhoor khloo, ki soh khloo kamjooh ki dawai kiwa boonjait kiwa i ye i wow chem napoh khloo.
Ha chwa ka lai kjat, ka Daka Bareh kawa man ka Program Associate yong ka SURE da e sikai wei batai yaki khynnah chaphang i emkaam wow baam yaki baam kiwa tei yei doh i pran wa ya kiwa san jait haka chi sngi naka chiphaw jait ki baam kiwa ye ki wow yoh na chnong.
Ha i por janmiet da em leh ka Cultural Program wa chimbynta da ki khon yong ka chnong kiwa da pynyoo yaki sap kawa em ki deilang leh ka rwai ka put tynre iwa da pynchongchit ya kani ka janmiet.
Haka step wa bood won da em ka sikai leh Yoga ya kawa da sikai da u Kamnipaia Challam uwa naka Art of Living Foundation. Hadien neitæ won da yoh yei siakai hajrong i ri sniang Bokashi da u Habandajop Lyngdoh wei pynbood won saka sikai chna sboh Bokashi. U Lyngdoh da e u leh ya ka sikai chaphang kammon wow rep tit khnang wow man ko ka laad yohkaam yohjam yaki.
Ha kani ka prokram da sikai leh yaki khynroo chaphang i sih ki dih pynmuiad wei kamjooh leh chaphang i kjut HIV/AIDS da ka Daka Bareh wa ka Corniki Slong kawa da saam chaphang ki laad puræ puthi wei kamjooh leh ki laad yohkaam yoh jam.
Kiwa chimbynta ha kani ka program da wan ki naka chnong kam na Wahïajer, Mukhap, Mupyut, Nongkhroh, Jowai wa na Samanong.
Discussion about this post