Ka Society for Urban and Rural Empowerment (SURE) da pynman ko yei pynche paidbah haka chnong Namdong-B chaphang ki kaam kiwa ka seiñ da kreh ko katni. Ha ka yalang kawa da pynlai da u Waheh Chnong yong ka chnong Namdong-B u DS War, da ong u wa ka chongkha khynnah khlem pu toh por toh kawi na i eh wa ka chnong da yachem ko ha kini ki por. Chooh chooh da khana u wa i pynkhlan yei rep i riang toh kawi na ki thong yong ka chnong hi waroh kawi.
Neiliang yong ka SURE da batai ko chaphang kiwa boon ki kaam wa da kreh ko neibynta ka rep ka riang kam ka Empowering Indigenous Communities through Agroecology Learning Circles (ALC) yow pynneh pynsah yei yong warim iwa da leh ha ki kattu katni tylli ki chnong ha West wa East Jaiñtia Hills District. Wei i thmu toh wow yoh ya ka beirymaw kawa biang kawa dap, kawa kynthup lang ya waroh deiwa yarap leh wow thooh ki laad thymme khnang wa ka mynried i yohbaam yohdih u man ko kawa chngaaiñ kawa dap (Food Security).
Hadien yong ini da yoh leh i klam hajrong ka phang i chong kurim dang khynnah iwa da ktah ya kiwa boon ki chnong ha ka imlang sahlang ya kawa da klam da ka Niwanka Shylla kawa kreh kam ka Zonal Supervisor yong ka Link Worker Scheme (LWS) kawa da kyrchaan da ka Meghalaya AIDS Control Society. Da ong ko wa i chongkha khlem pu toh por man i pyrchah ya ka aiñ wei da ktah leh yei im yong ki khynroo khyllood wei kamjooh leh ya ka imlang sahlang.
Ka Rosa Ksoo kawa man ka Village Organisation President hapoh ka chnong da yaroh ko ya ka SURE neibynta ini i pynche hawa yathoh wa i chongkha dang khynnah. Da ong ko wa ini toh i eh wa khroo hapoh ka chnong ka thaw.
Da yoh leh yei klam hajrong i kjut AIDS kawa da sdang boon katni wot cha ki thaaiñ palatsor leh ya iwa daklam da ka Darimika Lywait kawa man kam ka ZS yong ka LWS
