Ka Thomas Jones Synod College, Jowai kam chibynta i lehkmen yaka Silver Jubilee, ynne ka sngi da pynman ko yaka District Seminar For Faculty Development wada wan chimbynta da kiwa sikai haki kyrdan Higher Secondary wa kiwa sikai College waphær waphær.
I thmu yong kani ka Seminar toh yow yarap pynjanai yei rukom e sikai yong kiwa sikai katkam wa yah ka juk.
Hawa klam yahkhmat, ka Dr. I. Dkhar, Asst. Professor da ong ko wow ya beh yei rukom e sikai katkam ka juk Digital ym toh iwa suk ya kiwa sikai.
“Emkaam u sñiawthooh ha kawon ka rukom ye u yoh chooh chooh yei stat i tip, neibhah wym toh de du nei stat i tip kiwa sikai ye u pynsñiawthooh ya kiwa ap, tangwa kiwa chah sikai leh emkaam ki i sñiawthooh haki deilang kiwa sikai deiwa pynemkam ki laad sikai waphær waphær khnang yow ye u pynwandur rap bha.”
Da pynrap haroh ko wa i yoh yei tip i stat lai ko wei kylla haka juk stat Technology tangwa emkaam u lai chirup chirup hanla hap maad yei eh.
U kongsan yong kani ka sngi, u O. Lamin, Nominated MDC ka JHADC hawa e yei klam yooluti u wa kani ka Seminar u yarap ko chiboon ya kiwa sikai yow rap ye u pynbha chooh chooh i rukom e sikai, wei heijooh i por pynehbok haroh u wa i lehkmen Silver Jubilee ka Thomas Jones Synod College u man kawa jop wei lai bait lai ryntih.
Ki bru chemphang wada e sikai ha kani ka sngi kynthup ya u Dr. B.H. Buam, Associate Professor, College of Teacher Education, Shillong uwa da klam hajrong ka phang “Teaching Skills and Pedagogy in the 21st Century”, Dr. Q. Kharbuli, Associate Professor, UGC- Human Resource Development Centre, NEHU, Shillong, hajrong ka phang “Teaching and Learning during Covid-19: Effectiveness and Challenges”, Dr. Batskhem Myrboh, Asst. Professor, Department of Political Science, Synod College, Shillong, hajrong ka phang “Blended Teaching and Learning in the Digital Era”, ka A. Basaiawmoit, Associate Professor, Department of English, Shillong College hajrong ka phang “Introduction to Academic Writing”.
Ha kani ka sngi da yoh leh i klam na u Dr. D.G. Lyngdoh, Principal Thomas Jones Synod College, R. Pariat, Asst. Professor, S. Shylla, Asst. Professor, Dr. D.B. Lamare, Asst. Lecturer wa kiwi.
