Ha ka 5 tarik uni u bnai, ka Trekking & Adventure Group Dkhiah West hapoh i pyntoh pynbiang yong u Dr. Ryngkat Phawa da lai kaap kjat ki nadooh ka chnong Dkhiah West chadooh Shangpung deiwa chimbynta lang nadooh ki waheh, ki kynthai, ki chynrang, ki manbei ki manpa wa ki khynnah.
Ki waheh kam u Jiren Swer, u Muni Swer wot ha i rta wa da heh dang ye ki u lai yah luti. Wei hachwa u ya kaap kjat da wai phang yei thmu da u chongknor wei da yoh i klam sneiñ kyntu na u waheh chnong, u Comingone Tlang wei da pynkut da i klam wa i duwai na u Tbn. Livingstone Phawa (waheh chnong warim).
Da man ko ka sngi sahkynmoo ya kiwa da lai booddien ya ki luti ki warim wajah wa jooh kaap kjat ki hawa lai yaw lai haat wot hawa lai skur ki. Da jooh khana parom ki waheh wa dang tyndæ ki waheh na Dkhiah, Rymbai, Khliehriat, Sutnga, Saipung ter ter jooh lai skur ki chadooh Shangpung deiwa lai lyngba ka Kaitungtoh, Jalyiah, Khlieh Yurim Sohkymphor, Sohkymphor Neiñ, wah Umpaai, Khliehrangnah chadooh Shangpung Mission.
Da yoh leh kiwa chimbynta wow sakhi ya ar tylli ki skur warim tam kiwa ye u ong hapoh ri-loom Jaiñtia kitæ ka Shangpung Presbyterian Lower Primary School kawa da seiñ da u woh Don Sutnga (uwa man u Christan wa nongkong dooh na Shangpung) ha u snem 1865, kawa da ku kyrdan chadooh ME School, Secondary wa Higher Secondary waka Shangpung Govt. UP School (1924) Dong Moolibang. Ha kani ka skur Shangpung Presbyterian Lower Primary School da jooh wan sikai u myllung Soso Tham ha u snem 1922.
Da pdiang sñiawbha ya kiwa chimbynta da u Headmaster, u Nangtur Langstang wa kiwa sikai kitæ ka Rita Margareth Wann waka Laiaieit Suiam. Da khana yei parom ka skur da ka Rita Margareth Wann kawa man leh kawa sikai wa da rim ka skur wei da khana leh chaphang i lai luti wa i im u myllung Soso Tham da ka Percia Phawa.
Da pynkut da i duwai na u Muni Swer wei da yoh leh i dih cha sñiawbha wa da pynkhreh da ka skur.
Ini waroh da pynrum pynlung mynsien ko ya waroh hawa yoh u yoo u sakhi ya ki dienkjat ki waheh wa hadooh katwon sakhiat thrang ki ya i stat i tip hawa wot lada jngai u kaap chiboon wa i eh i khoo, i mynsiem thooh stat em i ha ki.
Chooh chooh wa pyndap dei kmen wa khroo wa uwa thoh kot, thoh poitri wa pawnaam tam ka jaitbru yong i jooh wan sikai u hapoh ri-loom Jaiñtia kawa pynmih chiboon ki khloor ka ri.
Neiliang ka Trekking and Adventure Group Dkhiah West da ong ko “Im slem ka kynhun kaap kjat. Kyrkhu kyrdoh i ya ka skur yow saiñdur chooh chooh ya chiboon ki moolangnai ka jaitbru yong i”.
Puræ leh: Lehkmen dap 150 snem ka skur wa jooh sikai u Soso Tham
