Jowai: Ka Tyllilang Sports Club Lapangap (TSCL) da pynman ko ya ka pynche paidbah namo ka Awareness Programme hajrong ka phang wa kammon u yada nei kjut Malaria.
Ya kani ka Programme da pynlai da u Welking Sumer heiwa da emlang u Headmaster ka UP School Lapangap, u Tellmi Dkhar, Secretary ka chnong Lapangap Pyllun, u Monbha Pyrpet, u Pyrkhat Pyrpet, Dr. Jame Rymbai In-charge yong ka PHC Namdong wa u Serverlin Inspector Namdong PHC wa u Malaria Specialist, u M. Passah wa ki khynnah skur ka UP School Lapangap kamjooh kiwa chong chnong.
U Dr. Jame da kyntu u ya ki khynnah skur wa ymhoi wow pep skur deiwa ong wa ka chnong Lapangap da paw ko chadooh ka sorkar pyrdi wa duna ha ka Injection ya ki khonboo (Immunization) neibhah ym kitkhia ya ka kaamram.
Da sneiñ neibynta i kaamram ya kiwa chong shnong wa ymtoh wow lai lait na kani wei da ong u wa emkaam wow man kiwa lehkhooid khnang wow lait na ka kjut Malaria.
U Passah da ong u wa emkaam wow man kiwa lehkhooid ya ki dooid-um, ki um-dih wei wow siat dawai DTT cha ki yung ki sem wow pynemkaam da ki puria khnang wow yada na ka kjut Malaria wa rah ki mait.
Chwa wow pynkut ya kani ka Programme da yoh ya ki kyntien e khublei na Secretary ka TLSCL, u Saikial Sumer.
Discussion about this post