Ka Thma U Rangli (TUR), ka Workers Power of Meghalaya (WPM) deilang waka Meghalaya & Greater Shillong Progressive Hawkers and Street Vendors Association (MGSPHSVA) kam chibynta wow pyrchah ya ki aiñ warep 2020 lane ki “Farm Laws 2020” kiwa da wanrah da ka sorkar BJP, iwa da wanrah yei yakhih pyrchah ya kini ki aiñ ha kylleiñ ka nongbah ka ri, da pynman ki daka yakhih pynsñiawthooh paidbah hajrong kini ki aiñ.
Kam chibynta wow kyrchaan ya ini, kiwa chong chnong, kiwa kreh mylla sngi wa kiwa chong dai madan ha ka jylla da chimbynta lang ki ha ini i yakhih yong ki warep ha kylleiñ ki jylla kam ha Punjab, Rajasthan, Maharashtra, Harayana, Uttarakhand wa Uttar Pradesh.
Hapoh ka jylla, ka TUR, ka WPM waka MGSPHSVA da pynman ki ya ka Poster Campaign ha kylleiñ ka nongbah Shillong, ha ka 25 tarik uni u bnai yow pyrchah ya ki aiñ ki warep.
Yaka Poster Campaign da pynman ha ki thaw chongdai madan deiwa pynyieñ yaki Poster kiwa da thoh yei pynche paidbah ya ki daw wow pyrchah.
Da dawa leh wow pyndam noh ya kini ki aiñ wa dang pynkrehkaam thymme, wow booh ya ki dor ki mar ki wym toh u pynduna namo ka Minimum Support Price hapoh ka jylla.
Da beiñ leh yei pyrchang ka sorkar pyrdi wow e laad yaki heh spah wa cha ki Company wow pynlai yei dai i thied kamjooh yei khayi ya ki mar rep, da ong leh wa kini ki aiñ thymme daw pynman ya ki warep kam ki mroo.
Kamtæ da khut ya ki warep ka jylla wow khyrngiat yong bru ki kamjooh ya ki bru ka jylla wow wan ki chakhmat wow kyrchaan ya kani ka yakhih.
