Pynman ka WJYC ya ka Career Guidance ha Amlarem

Amlarem: Ka War Jaiñtia Youth Council-Central Body ynne ka sngi da pynman ko ya ka Career Guidance ha Enowell Hall Amlarem kam chibynta wow pynche ya ki khynroo khyllood yow tip u kheiñkor ya ka mynried yong ki deiwa ye ki u jied ya ki laiñ puræ wa yatoh wa ki sap yong ki. Da wan wai ya kani ka Career Guidance da ka SDO ka Amlarem Civil Sub-Division ka kong I. Laloo,

Ka kong Laloo da e ko i klam ya ki wa 300 ngut wa em ha kani ka sngi kiwa puræ Class X, XI wa XII yow chim kabu ki ya kam kani ka laad yow tip ki ya ki laad puræ wa boon wa em ha khmat yong ki wei da pynchlur ko leh ya ki dkhot ka WJYC yow kreh chitom ki neibynta ka Sub Division.

Ha kani ka sngi da yoh leh ya ki batai tbian chaphang ka puræ puthi na u Branch Manager ka SBI Amlarem Branch wei da yoh leh ya i pynche na u Public Relations Officer yong ka R.R. Institution Bangalore uwa da batai ya kiwa boon ki laad ki luti puræ wei da ong u leh wa oo smat u wow yarap ya kiwon kiwon ki khynnah puræ yong kani ka thaiñ kiwa kwah yoh psiah ha ki thaw puræ wa em ha Bangalore.

Ya ka yalang da pyllai da u Lasting L. Gadew, General Secretary ka seiñ.