Ka World Music Day da lehkmen ya ka deiwa chongchit wei chongkun ynnin ka sngi hapoh i yahkhmat yahluti ki chi lok kiwa na Jowai deiwa pynman ya ka tamasa wa khian ha CTC Orchid Inn, Thadlaskein.
Kini ki chi lok kiwa maya yei put i tem da chim ki ka luti wow lehkmen ya kani ka sngi yow e ya ka rynsan ya ki dhab tem kiwa na chnong Jowai khlem dei thmu wow yoh nong.
Ki paidbah wa da ya embynta lang da yoh ki u ap u sñiaw ya kiwa boon ki jait ki sur ha kani ka sngi wei da sdang dei tem na ki ‘Toxic Pony’ kiwa da tem ya ki jait sur Pop Rock/Alternative Rock wei da pynbood sa ki ‘Kick The Day’ kiwa tem ya ki jait sur Punk Rock.
Hadien kini, da em leh kawa rwai wa pawnaam na Shillong, ka Maya Lyngdoh deilang waka lok yong ka ka Nicole Wahlang kiwa da wan wow pynwyrngia ya ki paidbah da ki sur wa thiang yong ki.
Hadien kini da tem sa ki ‘The Nexus’ kiwa tem ya boon jait ki jait sur nadooh ki warim, ki jait sur Blues wa Reggae.
Neitæ da tem won sa ki ‘The Grassroots’ ka dhab wa dang thymme na Jowai kiwa tem sur Reggae kiwa da pawnaam leh ha sor Shillong kiwa da pynkut leh ya kani ka lehkmen ya ka World Music Day.
Neiliang uwa yahkhmat ki The Grassroots, u Nick Dan da pynsñiaw u yei sñiawngooh ya kiwa pynman ya kani ka lehkmen ya ka World Music Day wei yei kynmoo ki leh khut ya ka dhab yong oo kawa dang thymme yow yoh ki wow e lang yei mynsien maya yei tem i put cha waroh. Da e khublei u leh ya waroh kiwi de kiwa da wan wow chimbynta ha kani ka sngi yow pyman yaka kawa jop wei da yooluti u leh wa daw pynman chooh chooh ya kam kini ha ki por kiwa daw wan.
