Kam chibynta wow ya ksohkti lang wa ka pyrthai waroh kawi ha ka World Environment Day, ka seiñ KSU Lumshnong Unit deilang wa ki khon khynroo ka chnong Lumshnong da thung ki kamwa 250 tylli ki dieñ ynne ka sngi.
50 tylli ki dieñ toh kiwa da e na ka KSU wa 200 tylli na ki khon khynroo ka chnong wei da thung kam chibynta wow pynneh pynsah ya ka bei rymaw wei yow man ko leh kam wow e sikai ya kiwi wa emkaam sakhiat wow pynneh pynsah ya ka rymaw.
Neiliang ki khon khynroo ka Lumchnong da pynsñiaw ki wa ym kut i kynmoo ya kani ka sngi pynneh pynsah ya ka rymaw du neibynta ynne ka sngi wei daw thung dieñ ki na ki por cha ki por.
Da ong ki wa i lehwarom ya ka World Environment Day ym toh u man ko du kam ka tamasa wa chi sngi lane du wow pyndep rukom donhi, wei man ko i kaamram yong uwi pa uwi wow pynneh pynsah ya ka rymaw, heiwa da pynsñiaw ki leh wow ri wow sumaar ya kini ki dieñ yow pyntikna wa kini ki dieñ im ki.
Ka KSU da e khublei ko ya ka chnat Forest Umkiang, Apha Range kawa da e sñiawbha ki dieñ yaka seiñ.
