Ki manbei yong ka chnong Namdong-B kiwa em hapoh ka Village Organisation (VO) da mih paidbah ki ynnin ka sngi kam chibynta wow lehkmen ya ka World Environment Day deiwa pynman yei thung dieñ yow pynneh pynsah yaka bei rymaw deiwa emlang u Waheh Chnong, u D.S. War, u Asst. Waheh Chnong, u Pius Ksoo wa u Secretary Chnong, u A. Shadap.
Hachwa u sdang yei thung ya ki dieñ da em ka yalang wa tbian kawa pynlai da ka Iris Lamare wei da yoh yei klam na u waheh chnong uwa da e yei yaroh yaki 2 tylli ki VO kiwa em hapoh ka chnong Namdong-B kiwa tip kam ka VO Block-1 waka VO Block-2 kiwa da chim yei kitkhlieh wow lehkmen ya ka sngi pynneh pynsah ya ka rymaw.
Da ong u leh wa ym toh wow pam khiar ya ki dieñ neibhah ki dieñ ki siej e ki ya ka la-ær wa khooid wei na ki dieñ yoh i ya ki tyllong um kiwa jngiar, kamtæ lada hap u pam dieñ toh u thung salan da kiwi yow yoh ka chnong ya ka la-ær wa khooid wa ka soodong sookun kawa yirngam wa ki lum ki wah kiwa dap wa biang.
Da kyntu u leh ya ki manbei wow sumaar ya kini ki dieñ hadien wa dadep wow thung khnang u heh u san ki yow lait nei chah tympat.
Da pynut da ki ktien e khublei na ka Rosa Ksoo kawa da e khublei ya ki para dkhot wei kamjooh ya kiwa kitkaam yong ka chnong kiwa da ya mih ryntih wow chimbynta ha kani ka World Environment Day.
