Ha ka yachemlang wa 11 yong kiwa sikai College sorkar hapoh ka satri ka Meghalaya Government College Teacher’s Association (MGCTA) wa pynlai daka Jowai Unit ha Auditorium ka Kiang Nangbah Government College Jowai ynne ka sngi, ka Principal yong kani ka College, ka Dr. E.M. Blah hawa e yei klam da ong ko wa kam kiwa sikai ka thong wa hakhmat dooh toh u pynwandur yei stat i tip ya ki khynroo khyllood puræ ha waroh ki liang najrong wa em haroh ki ka bynta wa khroo ha ka imlang sahlang wei hei im ki khynroo khyllod wa lai puræ.
“Kamwa yaka MGCTA da seiñ ha u snem 1989 ha Tura Govt College, da leh ko chiboon kiyi kiyi wa emkaam, kam hei wow yarap pynpliah yei im i man ki para dkhot, wow e mynsien wei wanrah leh i sñiaw yajan hapyrdi ki para dkhot,” ong ka Dr. Blah.
Ong haroh ko wa kam kani ka yachemlang wanrah haroh ko i yatylli i khlan neibhah wa yoh ya ka laad u saam kylliang yei buit i tip. Wei hawa em i yatylli pynman ko ya kawon kawon ka kynhun kawa khlan wei kawa poi chei thong.
Neitæ yooluti haroh ko wa kani ka kynhun kiwa sikai u nang ku ko chaphrang ha ki liang waroh.
Ha ka yalang wa pynlai da ka Dr. (Mrs) R.W.Thangkhiew, da yoh i klam pdiang na u President ka MGCTA Jowai Unit, u H. Toi.
Da yoh leh i chaad tynre na ki khynroo khyllood ka College, i rwai ya ka College Anthem yong ka Kiang Nangbah Govt College wa ki kyntien e khublei na u Dr. S. Nongkhlaw.
