Shillong: Ki seiñbhalang wa kynthup ya ka Khasi Students’ Union (KSU), ka Federation of Khasi Jaintia and Garo Peoples (FKJGP), Hynniewtrep National Youth’s Front (HNYF) wa ka Ri-Bhoi Youth Federation (RBYF) ynne ka sngi da pynman ki yaka lai paidbah da ki thuk thuk ha kylleiñ ki bynta ka sor Shillong wow pynsñiaw yei pyrchah ya ka Citizenship Amendment Act, 2019, wei kamjooh wow pynsñiaw yei dawa Inner Line Permit ha ka jylla.
Ha kani lai Rally kitai ki seiñbhalang, da sakhi leh ya i em boon ki pulti kiwa pait wa sonteri yow lait u jia iwon iwon wa ktah ya ka suk ka saiñ.
U President ka KSU, u Lambokstarwell Marngar da ong u wa i pynman ya kani ka Rally toh wow phah khubor cha ka sorkar wa ki seiñbhalang ha ka jylla man ki kiwa pynkhreh lada ka sorkar ym ye ko wow mynjur lang ya ka jooh ka rai wow dawa ya ka ILP ha ka yung dorbar.
Da ong u wa ka sorkar ym toh u sahkut ko du wow lai cha Delhi neibynta wow pyllait ya ka CAA, neibhah i dawa wow pyllait na katai ka aiñ ym toh i jop. Da pynrap u deiwa ong wa lada ka sorkar India ye ko wow e yaka ILP ha Manipur iyi i eh ya ka jylla Meghalaya.
Neiliang u President ka FKJGP, u Wellbirth Rani da ong u wa ini i mih yong ki seiñbhalang toh wow pynbor bait ya ka sorkar wow chimkhia ya i dawa ki paidbah. Da ong u wa i diñ ha Shillong da sdang i wei lada ka sorkar ka kwah ko wa ki paidbah u man ki kiwa jai jai da toh ko wow chim ya ka rai pynkrehkaam ya ka ILP.
Da ong u wa ini toh i sien wa khaddooh wa ka jaitbru u yakhun wow yoh ya ka ILP wei ka sorkar ym toh u lehke de ko ya i sñiaw ki paidbah. Da ong chooh chooh wa ka 19 tarik daw rai ya i long ka jaitbru wei ka sorkar hap ko wow chim ya ka kitkhlieh, neibhah lada ka sorkar ym ye ko wow leh iyi iyi leh, ki seiñbhalang ym yohsa ki wow yakhun wei da pynkhreh leh lada toh u poi patok.
Discussion about this post