Jowai: U Kynjaimon Amse na ka chnong Umkiang, EJH da thoh u cha u Justice SR Sen u Judge ka Meghalaya High Court ha ka 13 tarik uni u bnai heiyatoh wa i sih u sarok Sonapur-Borkhat uwa poi cha ka chnong Hingaria, Huroi, Lahalein wa Lejri heiwa u Kynjaimon wa ki lok u dadep kyrpaad ki ya ka sorkar jylla da boonsien wow chna ya uni u sarok wa emkaam kini ki chnong kiwa em palat 3000 ngut kiwa chong wa sah kiwa da dooh myntoi da boon snem neidaw wa sih uni u sarok neidaw wym chimkhia ka sorkar.
Da pyntip ki leh wa da dep yachem ki wa u montri rangbah ka jylla wa u lat ka jylla wei na ki da yoh du ki chithi donhi.
Ya u Conrad da yachem ki ha u Naiynru uni u snem ha kamra krehkaam u wei da kular u wow leh yeiwa emkaam hapoh le bnai tangwa hadooh katni ym pu em mih soh ini i kular.
Ka RBBJ Project kawa chong dor hadooh T. 97 klur tangwa ym ye ko u yoh ya ka Environmental Clearance hadien wa ka sorkar da pynlut T. 21 Lak ha ka Company ki bru samen tangwa kattæ leh ym yoh ya ka Environmental Clearance wei ka chnat PWD(R) leh ym ye ko u leh yow yarap ya ki chnong wa em cha khappood.
Chooh chooh da pyntip wa ini wa dep da yachem ki wa u Secretary PWD(R), u Executive Engineer, NEC Division, PWD(R), Khliehriat wei da pyntip ki wa ka sorkar ymye ko u yoh ya ka Environmental Clearance neibynta u sarok RBBJ kamtæ ka sorkar da pyrkhat ko wow pyrchang da iwa thymme neibynta uni u sarok.
Kamtæ u Justice SR Sen, Judge Meghalaya High Court hadien wa yoh u ya kani ka chithi, da rai u wow pynkylla noh ka cha ka Public Interest Litigation (PIL) wei da booh leh ya ka sorkar Meghalaya waka sorkar India kam kiwa embynta lang ha kani ka PIL wei daw chong bichaar nyngkong ya ka ha ka 28 tarik uni u bnai hakhmat ka Division Bench ka HC.
Discussion about this post