Ka School Managing Committee yong ka Seinraij LPS SSA Mukhap wa em ha Laskein Block kam wow pynchlur wei wow e laad ya ki khynnah skur u pynyoo pyntaw sap ki ha madan da ki yakob waphær waphær, da pynman ko ya ka Annual School Sports Meet 2022 wei kam ka dak i sdang ya kani ka Annual School Sports Meet kawa man ha ka sngi Musiang 23 Wisu, u Rangdajied Lapasam, Secretary VEC Mukhap hei emlang u General Secretary Seinraij Mukhap wa u Ialamlang Suchiang, Secretary Waheh Kni Seinraij Mukhap da pynhær u ya ka lama yong ka skur.
Ka Kheinkor Niang, Head Teacher Seinraij LPS SSA Mukhap kam ka chongknor yong ka yalang yahkhmat wa tbian, da e ko ki kyntien yahkhmat wei da khanna ko leh yei lai luti ka skur hei wow pynman ya kani ka School Sport Meet nadooh u snem 2012.
U Rangdajied Lapasam hei e kyntien hapyrdi ki khynnah wa kiwa sikai da yaroh u ya ka School Managing Committee kawa da chimkhia u kreh na ki por cha ki por heiyatoh wei miat i bha ki khynnah kamjooh ya ka skur wei chooh chooh pachat u leh ki kyntien snien kyntien kroo wei e mynsien ya ki khynnah wow pynwyrngia yei por ha ki kaam yalehke Sport najrong i por krehkot wa kiwi kiwi ki kaam ha yung hasem.
Ha ki le sngi yong kani ka School Sports Meet, ki khynnah da yohlaad ki u chimbynta wei u pynyoo pyntaw sap ha ki yakob waphær jiar la i kyrdan puræ yong ki wa kynthup ya ki Race, ki Traditional Sports kamjooh leh ka March Past, Mass Drill wa kiwi.
Ya kani ka School Sports Meet yong ka Seinraij LPS SSA Mukhap da pynkut ha ka sngi Pyngkat 25 Wisu wei da saam leh ya ki Trophy cha ki khynnah wajop ha ki yakob waphær.
