Kam chibynta wow pteiñ yei pynche paidbah hajrong ka khlam COVID-19 wei hajrong i tika yada na kani ka khlam, ka yung krehkaam u Block Development Officer ka Mairang C&RD Block da pynman ko ya ka yalang pynche paidbah ha pchem yong ka Laitdom Presbyterian Secondary School, Laitdom Mawlieh, Laitdom heiwa u Lamphang ka yung dorbar chna-aiñ yong ka Meghalaya Legislative Assembly da wan u kam u kongsan hei emlang u BDO ka Mairang C&RD Block u V. Swer, ki wakreh yong ki chnat sorkar waphær waphær, ki Sordar chnong ka thaaiñ, kiwa yahkhmat niam wa kiwi kiwi de.
Ha kani ka yalang da yoh leh yei pynche paidbah na u BDO ka Mairang C&RD Block wa kiwi de ki sahep sorkar hajrong ki Scheme pynroi waphær waphær yong ka sorkar bei kam ka PMAY, NRLM, MGNREGS, DDU-GKY wa kamtæ ter ter.
Ha i klam kam u kongsan, u Lamphang ka yung dorbar chna-aiñ ka jylla uwa man leh u MLA ka thaaiñ, u Metbah Lyngdoh da ong u wa ki Scheme pynroi waphær waphær yong ka sorkar bei kiwa kynthup ya ka MGNREGS da yarap ki hadooh kattæ kattæ wow kyntu ya i yoh i kot yong ki paidbah wa chong chnong ka ri khamtam kitu kiwa sah ha ki thaaiñ nongkyndong wei da kyntu u leh ya ki paidbah wa kiwa yahkhmat chnong wow ya bood ryntih ya waroh iwa da phah thymme hajrong ka rukom pynkrehkaam ya kini ki Scheme neibhah i thmu hi man ko wow rap pynjanai chooh chooh ya ka rukom pynkrehkam ya ki neibynta i bha i miat wa i myntoi u paidbah.
Hawa klam hajrong i long i man ha ka ri wa ka jylla neidaw yong ka khlam COVID-19, u Metbah da pynkynmoo u ya i ya krehlang wa chitbha da waroh kiwa chong chnong yong ka jylla ha ka la-ær wa nyngkong yong ka khlam ha u snem wa da lai noh wei da kyntu u leh ya ki paidbah wow pteiñ ki u husiar deiwa bood pynrkhiñ ya waroh iwa phah yong ka sorkar hawa yatoh wa ki laad yada na i poor yong kani ka khlam ha kani ka la-ær wa ar kawa katni wei wow pteiñ yei kyrchaan ya ki wakreh yong ki chnat sorkar waphær waphær ha i pyrchang yong ki wow yada nei poor chooh chooh yong kani ka khlam ha ka ri wa ka jylla.
U Metbah da kyntu u leh ya ki paidbah wa chong chnong wym toh u ap ya ki khubor thok wa ki khubor wym toh neibhah wa kini em ki yei bor wow yahbakla ya ki paidbah wei kiwa ye leh wow man kam u moochynthut hawa yakhun pyrchah ya ka khlam COVID-19 da ki bor sorkar wa ki bor chnong bor thaw.
Ha kani ka sngi da pynman leh ya ka yalehke wa tbian (Skit) hajrong ka phang “Yada ya ki khon na u khñiang COVID-19” ya kawa da pynyoo da ki wakreh yong ka PHC Laitdom wa kiwa chong chnong ka thaaiñ deiwa emlang ka Dr. Anita kawa da wan neiliang yong ka World Health Organization (WHO).
Kiwi de kiwa klam ha kani ka yalang kynthup ki ya u BDO ka Mairang C&RD Block u V. Swer, u Andrew Sawian uwa da mihkhmat ya ka Indian Red Cross Society, u District Programme Manager, DDU-GKY, Nongstoin, u B. Marbaniang, u Medical Officer ka PHC, Laitdom, u Dr. N. L Mawnai wa u Sordar ka chnong Laitdom Mawlieh u H. Lawriniang.
Hadien wa da wai ka yalang da sakhi leh ya i e tika yada COVID-19 ha katai ka thaw kawa da pynman ya ka yalang.
