Kam chibynta wow pynche paidbah hajrong ki kaam wa yatoh wa iñ wa i chah thang khloo, neiliang ka yung krehkaam u Range Forest Officer, Social Forestry & Territorial Range, Mairang da yoh ki wow pynman ya ka yalang pynche paidbah hajrong kani ka phang ha Markasa Secondary School, Markasa deiwa embynta u Range Forest Officer ka Mairang Range, u B.M Kharkongor, ki wakreh ka chnat Fire & Emergency Services, Mairang, kiwa yahkhmat chnong wa kiwa chong chnong ka thaaiñ.
Ha kani ka sngi, neiliang ki wakreh ka chnat pynneh pynsah ya ka rymaw wa ki pulit wa tympleh diñ hawa e ki yei klam da pynsñiaw ki yei sñiawkhia hajrong i iñ khloo wa da jia dei langær ha ka thaaiñ wa ha ka jylla hi waroh kawi khamtam ha i por tlang iwa da ktah hadooh kattæ kattæ ym du ya ka rymaw wa ki thung ki tep kiwa em ha ka tangwa ini da booh ko hei maa wot ya ki manyung mansem yong kiwa chong chnong kiwa em markhap wa ki khloo ki kjam.
Kiwa kreh kiwa da e yei klam ha kani ka sngi da kyntu ki ya ki paidbah wow kiar nei thang khiar yow rngaw, neibhah ini wanrah ko yei chah ktah hadooh kattæ kattæ ya ki khloo ki kjam wei da kyntu u ya ki paidbah wow thooh laad thooh luti da kiwi won ki rukom kamai jakpoh ki wym ktah ya iwa em ha ka bei rymaw.
Chooh chooh da kyntu leh ya ki paidbah wow chim ki yei kitkhlieh wow sumaar ya ka rymaw wei wow ya krehlang leh wa ka chnat pynneh rymaw nadooh wow ya thung dieñ wa kiwi kiwi de.
