Dei thong wow wanrah yei yaklam hapyrdi ki LGBTI+ kiwa em ha ka thaaiñ wa ka Meghalaya State Legal Services Authority (MSLSA) kamjooh yow sdang ki yaklam wow ye ka MSLSA wow yada yei hok yong ki LGBTI+ kiwa em hapoh ka jylla, da pynman da ka Webinar hajrong ka phang ‘Lost Identity-Transgender Persons in Indian Prisons’ ynne ka sngi da ka MSLSA deiwa ya krehlang waka Commonwealth Human Rights Initiatives.
Ya kani ka yalang da pynman ha yung krehkaam ka MSLSA, Shillong.
Hawa e yei klam, u NA Khan, MHJS, Member Secretary MSLSA wa District & Sessions Judge da klam u chaphang i chah leh chiliang ha ka imlang sahlang, ka synchaar khadar ya kitu kiwa ym em sñiaw yahap yeiwa da booh ya ki kam ki chynrang lane ki kynthai wa kiwi wa phær i rukom man ki hadooh ka chongkha chongman
U Khan da ong u wa ka Supreme Court ha ka hukum wa pynmih ha u 2014 lyngba ka mukotduma ka NALSA Vs. Union of India, da tipmit ya ki bru wa ym toh ki chynrang lane kynthai wow tipmit ya ki kam ki kam ki “Third Gender”, kamtæ da ong u wa kani ka hukum da pynkitkhlieh ko ha ki jylla wow tipmit ya ki Third Gender, yow pyntikna leh wa yoh ki u chimbynta haka imlang sahlang kamjooh yow yoh ki yei hok yong ki katkam ka aiñ.
Da ban joor u leh yei emkaam ya ka jylla, ki pulit, ka chnat patok wow leh ki yeiwa emkaam katkam ka hukum wa da pynmih lynga ka mukotduma ka NALSA.
Ya kani ka Webinar da wan wow ya embynta lang da kiwa mihkhmat na ki Pulit, ka chnat Patok, ka chnat Social Welfare, ki muktiar, ki Para Legal Volunteers, Secretary ki District Legal Services Authority, ki bru na ki LGBTI+ wa em ha Meghalaya ki NGO kiwa kreh neibynta yong ki kam ka SAATHI wa Samakami.
