Ki Lawyer hapoh ka seiñ High Court of Meghalaya Bar Association wa ka Shillong Bar Association da pynman yakhih ki ynne ha Shillong yow dawa pyndam noh ya u Advocate General, u Amit Kumar.
Ki muktiar da pynman ki yei lai kjat nadooh na u mot u Kiang Nangbah hajan ka Shillong Civil Hospital deiwa lai lyngba ka Barik wa Malki Point, heiwa da em boon ki muktiar wa chimbynta na kylleiñ ka jylla heiwa kini ki ar seiñ da kam ki wa em palat 1000 ngut kiwa chimbynta.
Hawa yaklam wa kiwa thoh khubor, neiliang u General Secretary ka High Court Bar Association, u KC Gautam da ong u wa da yoh ki yei kyrchaan na ki Bar Association kiwa na Garo Hills, Jaiñtia Hills wa kiwi de ki District.
Ki Lawyer da boh ki yeiwa klam u Advocate General heipor wa em i bichaar wei da kylli ki leh ya ki rai wa da chim da ka yung krehkaam u. Da pynbaad ki wa u Amit Kumar ym em da leh u deiwa biang hawa yasaaid ya ki mukotdam wa chah leh khlem akor ki kynthai, pynlut u ya ka poisa paidbah yow wanrah Lawyer na Delhi wei da thung u pyn ya u khon u kam u Muktiar hapoh ka State Panel.
U Gautam da beiñ u leh yeiwa ong u Chief Minister, u Conrad Sangma wa ka Meghalaya toh kawa embhah wow yoh ya u Amit Kumar kam u Advocate General, deiwa ong wa ini toh iwa khlem da pyrkhat ya kiwi kiwa man kam ki muktiar kamjooh i pynman yakhih ki.
Da pyntip leh wa ki Bar Association dadep ki wow e dei thoh yow dawa pyndam noh ya u Amit Kumar tangwa ym em yoh laad won ki wow yachem wa u Chief Minister.
Da ong ki wa ini i dawa wow pyndam noh ya u Amit Kumar toh iwa da yoh yei kyrchaan da waroh ki muktiar ka jylla.
Discussion about this post