Ynne ka sngi ka seiñ Jaiñtia Students’ Union (JSU) hapoh i yahkhmat u Neilkee Mukhim uwa man u General Secretary ka seiñ da pynman ko ya i yakhih wa jai-jai ha pchem ka yung krehkaam u Deputy Commissioner ka West Jaiñtia Hills District.
Ha ini i yakhih da rah ya ki lama ka seiñ kamjooh wa ki kotrben wa thoh ya ki kyntien beiñ ya ka sorkar kamjooh wow kylli yi wow yada ya ki paidbah ha khappood khamtam ha Lapangap wei iyi jia yei pynbait pood.
Hadien kattu katni por da mih u Magistrate, u F. Passah uwa da yaklam wa kiwa kitkaam ka seiñ kiwa da khana wa kwah ki wow yachem wa u DC heiwa hadien ini da pyntip wa daw yoh ki wow yachem wa u DC hei janmiet.
Hawa yaklam wa u Neilkee da ong u wa i daw wa pynman ya kani ka yakhih toh wow dawa na ka sorkar yow yada ya ki paidbah wa ki warep ka Lapangap neibhah ym em mano ka sorkar yeiwa jia heitai.
Da ong u leh wa da e dorkhat ha ka sorkar kam ha u Dy. CM ka jylla, u Prestone Tynsong wa kamjooh wa ka DGP ka jylla ka I. Nongrang wow dawa yada ya ki paidbah ha katai ka chnong tangwa hadooh ynne ym em u yoo yeitæ.
Da pyntip u leh wa dang em sa 30 tylli tam ki manyung wym pu yoh u thung kba ha Lapangap wei sa uni donhi u bnai wa ye u leh yeitæ.
Hadien wa kular wow yoh yachem u yaklam wa u DC, neiliang ka seiñ da rai ko wow sangeh yakhih chipor kat hadooh i janmiet.
Discussion about this post