Chibynta i dak kynmoo warom ya ka lyngkhooh snem yap wa 159 U Kiang Nangbah, khlawait ka Ri 12 Dolloi ka wow man ha kani ka 30 tarik Kmaichonglad 2021, ka Women’s Welfare Organisation Seinraij Jowai ha ka sngi Thymblein 28 tarik Kmiachonglad da pynman ko ya ka yakob dro dur (Drawing Competition) wa ka yakob thoh kyntien (Slogan writing) heiyatoh wa U Kiang Nangbah.
Ka thong yong i pynman ya kini ki yakob toh chibynta wow khriñ yei pyrkhat pyrdaiñ ki khynnah chaphang ki kaam U Kiang Nangbah kam u Khlawait ka Ri wa ki thaw sahnaam sah parom kiwa em hapoh ka chnong ka thaw kiwa yatoh wa ki por yaleh ki khon ka Ri 12 Dolloi wa ki bor ka sorkar pharæng.
Ya ka yakob dro dur da phiah ha ki kyrdan waphær kiwa kynthup ya ki khynnah 6-10 snem, 11-14 snem wa 15-18 snem katwa ya ka yakob thoh kyntien (Slogan Writing) won da pynman du neibynta ki khynnah wa 11 snem chaneiñ wei ya kiwa jop yong kani ka yakob u pynbna ha ka sngi Khyllaw 30 tarik Kmaichonglad ha ka yalang kynmoo warom wa kyrpang ya ka lyngkhooh snem yap wa 159 u Kiang Nangbah ka wow man ha madan Mynkoipyrdi Iongpiah hei pait i pynlai ka Seinraij Jowai.
