Ynnin ka sngi ka 3 tarik, ka chnat pulit West Jaiñtia Hills District Executive Force da pynman ko yaka Awareness Programme namo i pynsñiawthooh paidbah heiyatoh wa ki kaam thombor pyrchah yaki kynthai waki khynnah namo ka Crime Against Women and Children, haka chnong Kyndongtuber Dong Lumkhangdong.
Ya kani ka yalang, da yahkhmat da ka Deputy Superintendent of Police WJH District ka C Lyngdoh MPS, ka I. Kharpran Women Police SI, u Francis Langlein naka Childline wa kiwi kiwa wan lang wa ki.
Yaka yalang da pynlai da u Waheh Chnong Kyndongtuber u Shiwa Siangshai. Da wan wow ap u sñiaw ya kani ka Programme daki khon khynroo khyllood yong ka Dong Lumkhangdong, ki waheh, ki manbei wa ki khon kynthai yong ka chnong.
Hawa e yei klam pynsñiawthooh hapyrdi ki khon khynroo ka chnong, ka C Lyngdoh Dy. SP, da batai ko ya ki aiñ ki kanun wa ki kaam kiwa yatoh wa i lehbeiñ i thombor pyrchah yaki kynthai wa ki khynnah, i chongkha khynnah, i lehbeiñ yaki khynnah kynthai haki thlu yung namo Domestic Violence, ka POCSO Act, wa kiwi. Da e ko yei sneiñ i kroo wa kiwa dang khai khynroo khyllood toh u tip bha ki yoh u lait ki nei kaam sih namo ki kaam pyrchah aiñ pyrchah yei manbru longbru. Da ong ko leh wa boon ki khynnah kynthai tiensar ki u mih na yung wow lai emkaam khamtam hei por miet du wa tieñ yei chah thombor ha ki chynrang, kamtæ da kyntu yaki chynrang wow yada ki heithaw u pynsier ki. Da sneiñ ko leh wym hoi u chongkha khynnah kat wym pu toh i rta wa da booh ka aiñ neibhah kiwa pyrchah yeini daw chah pynsaja ki, da sneiñ da kroo ko wym hoi u yamai yakajia hapoh yung poh sem namo i dat kurim ki chynrang. Da kyntu ko yaki khynnah kynthai kiwa chah thombor wa emkaam u pyntip ki cha ki pulit namo ki waheh chnong wa ki VDP yow yoh ki yei yada.
Neiliang ka Childline da yoh yei batai wei klam yei rukom krehkam yong ka na u Francis Langlein, kawa em yung krehkaam ha Lumbihsyntu Mihmyntdu, da ong u wa kiwon kiwon kiwa emkaam yarap neibynta ki khynnah ye ki u phone ha u number 1098 namo sak cha ka ophis number 8014710276.
Neiliang ka I Kharpran Women Police SI da e ko yei batai wa tbian wei jubab leh kattu katni iwa kylli ki paidbah.
Da pynkut yakani ka yalang da u Waheh Chnong uwa e khublei sñiawngooh ya kani ka chnat krehkaam yong ki pulit wa da wan pynsñiawthooh paidbah ki yeiwa emkaam tam ha kani ka chnong wei da yooluti wa ki kamsih kamroi u kut noh ki neini chakhmat.
Ha kani ka yalang da pynemkaam yaki Mask wei da bood leh yaka Social Distancing.
Kani toh ka wyrta wa phah da u Secretary Chnong Kyndongtuber, u Dasumar Shylla.
