Ka seiñ HNYF Central Body ynne ka sngi da pynmih chnat ko ha ka chnong Sohkymphor kam chibynta wow pynheh chnat hapoh ka bri u Ynñiaw Wasa.
Hachwa wow pynkha ya kani ka chnat wa thymme da yoh yaki ktien pdiang burom na u Julius Nongtdu, President ka HNYF East Jaiñtia Zone haka yalang wa pynlai da oo hi, da yoh ki ktien sneiñ na u Hauni Wot Sutong, President ka HNYF West Jaiñtia Zone wei da yoh leh yei klam na u Lamsuk Langstang, President ka Eastern Region, katwa ya i batai ya i rukom kreh ka seiñ da yoh na u Sadon Blah, General Secretary ka Central Body uwa da pynsmai leh ya ki dkhot ka seiñ.
U Blah hei klam yong oo da ong u wa i kaam kreh seiñ man ko ka kaam kreh laitlooid kawa ym em i su wei man ko leh i kreh mon sñiawbha donhi deiwa kyntu leh wym hoi u pynemkaam bakla ya i pyrtuid ka seiñ deiwa kamai spah samen wei lada chem kam kitæ ki dkhot, ym em kitkhlieh neiliang ka seiñ wei u beh syndon napoh ka seiñ ya kam kitæ ki dkhot.
“U kit ya ka ri wa ka jaitbru chong ko ha i mon samen wa i chynrang mynsien ym hoi u chah yah bakla lane pynemkaam bakla ya i burom ka seiñ,” da ong u Blah.
Yaki kyntien e khublei da yoh na u Damechwa Syrti, General Secretary Eastern Region.
Kiwa kitkaam kani ka chnat kawa tip kam ka Sohkymphor Circle man ko kamni hawah:
President: Marlistar Lyngdoh
Vice President: Pyniow Lyngdoh
General Secretary: Phaiwon Suchiang
Asst. Secretary: Lastmon Talang
Publicity Secretary: Iaidmon Bareh
Finance Secretary: Karbi Tang
Education Secretary: Phrangki Talang
Organising Secretary: Pynlumlang Lyngdoh, deilang wa 15 ngut ki dkhot.
