Jowai: Ka Dorbar Chnong Panaliar da pynbna ko ynne ya waroh ki khon ka chnong, ki palat chnong najan najngai, ki seiñ bhalang, ki seiñ niam wa kiwi kiwi wa iwon iwon iwow leh ki hapoh u pood u ang ka chnong nadooh i khian hadooh i heh, emkaam u yohbor ki na ka chnong khnang yow ye ki u pynphet ya ki kaam yong ki.
Ka chnong Panaliar toh kawi na ki chnong hapoh Jowai wa em ki thaw uiñke sawari, kiwa riñ ya kiwa nabaar wow wan uiñke cha kitæ ki thaw. Kamtæ ka chnong khut ko yei yakrehlang yong waroh ki khon ka chnong heijooh i por kiwi tawon kiwa uiñ wa lai cha kitæ ki thaw wow ri ki ya i akor i burom yong ki samen samen, wymhoi u klam ki ktien khlem akor, u leh ki kaam wa pyrchah ya ka aiñ, kam i dih kiad, yakhle wa kiwi kiwi hapoh ka chnong ka thaw neibhah ka chnong hi dajooh khang pyrchah ko ya kiwa dai kiad hapoh u pood yong ka.
“Hajrong wa da kyrpaad wei da pynbna kamni lada chem won ya kiwon kiwon kiwa pyrchah, ka chnong ye ko u leh ya iwa emkaam katkam ki aiñ chnong” da ong u Secretary ka Chnong.
Seiwi won, ka chnong Panaliar toh kawi na ki chnong wa ka Wah Myntdu lai luti ko lyngba yong ka. Kamtæ, ha ka yalang wa dakhut da u Deputy Commissioner, WJH hei yatoh wa i khooid i jngiar, i won iwon i chna harood ka Wah Myntdu, da phah ya ka Dorbar Chnong wow pynbna paidbah ko wa “Dakhang pyrchah ya kiwon kiwon ki wow noh jakhlia jakhlait, khyndaw u chyiap kiwa ye u kai cha ka Wah Myntdu wei heijooh ipor, ymchah de u chna yung harood ka Wah Myntdu hapoh i jngai wa 500 meter”.
Da pyntip leh wa dang em chooh ki rai waboon ha katæ ka yalang kiwa ka chnong daw pynbna ko hadien habood.
Kamtæ ka chnong da kyntu ko ya ki paidbah wow yakrehlang wa ka neibynta i bha i miat.
Discussion about this post