Pynmih hukum ka Iawmusiang yow yada ya ka wah Myntdu

Jowai  Ka Dorbar Dong Iawmusiang da pynbna ko ya ki kyndon thymme yong ka hei yatoh wow yada ya ka Wah Myntdu katkam ka hukum wa pynmih ka NGT.

Ka Iawmusiang da kyntu ko ya waroh kiwa chong chnong ki tre yung, kiwa chim wai kiwa haap hapoh u pood u ang ka Dorbar wow bood ki ya kini ki kydon.

Ya ki kyndon da pynmih hadien wa da pynman ya ka yalang ha pyrdi ki Waheh Chnong, ki Secretary Chnong wa u DC ka West Jaiñtia Hills hei emlang leh ki sahep sorkar na ki tnat waphær waphær heiwa da yaklam wa kammon u wanrah biang yei khooid ka Wah Myntdu.

Kamtæ neiliang ka Dong da rai ko wow pynmih noh ya kini ki kyndon ha wah katkam i rai ka NGT.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da khang pyrchah wa ym chah de u noh jhep kat cha wa yoh neibhah da dep booh ya ki thaw nohjhep (Dustbin) wow pyllang kamjooh leh da em ki Truck ka Municipal wa wan man ka janmiet ha ki le tylli ki thaw 1. Lad Thomas Jones College 2. Lad KNB Road 3. Ha ka laad wa jooh psiah cha ka yaaw warim wa em mar pyrchah ya ka Treasury Office waka CNI.

Da phah leh ya ki tu kiwa dang pyntooid ya ki paikhana cha ki nala paidbah (Public Drain) wa da toh por u chna ki ya ki Septic Tank wa ki paikhana wa katkam ka juk wa katni. Neibhah hadooh katni leh dang em ki yung wa dang pyllai ya ka paikhana cha ki nala wei i jakhlia lai bait ki cha ka Wah Myntdu, wei ye ko u wanrah ya ki kjut wa boon jait. Kamtæ katkam ka rai ha ka yalang wa u DC da e por 3 bnai wow chna ya ki paikhana wa katkam ka juk wa katni wei wow pyllait chikamra na i yung yong ki lada ym em thaw de u chna paikhana.

Da chim leh ya ka rai wow khang pyrchah ya kiwa chna yung thymme ha ki rood ka Wah Myntdu kamwa 500 meter na ki rood wah, khamtam ha u loom Chah Tngit hajan ka Jowai-Amlarem Bypass, Yingkieñmoo wa Riatsiatsim. Neiliang ka Dorbar Dong ym e NOC de ko cha kiwon kiwon kiwa em thaw ha ki tai ki bynta wow chna yung wei kamjooh ka NOC wow leh Land Holding Certificate.

Da khang pyrchah leh wa ymhoi de u lai sait that ha ki rood ka Wah Myntdu neibhah ini leh mih ki jakhlia kamjooh na ki sabon wa pynemkaam.

Lada chem ya kiwa leh pyrchah ya ini waroh daw pynchitom ya ki katkam ka aiñ.