Shillong: Heiyatoh wa i long i man hapoh ka jylla wa haka ri waroh kawi neidaw ka khlam COVID-19, u Chief Secretary & Chairman, State Executive Committee, State Disaster Management Authority, Government of Meghalaya da pynmih hukum u ynne ka 26 tarik wow phah ya waroh ki khlieh kamjooh kiwa pynlai yaki thaw puræ hapoh ka Meghalaya wa ym toh u pynkylla yaka bai skur kawa nadooh u snem puræ 2019-2020 neibynta u snem 2020-2021 ha waroh ki thaw puræ.
Kani ka hukum da ong ko wa ym toh wow chim yaka bai skur (Tuition Fees) na kiwa wan na ki manyung wa dooh wa duk (Below Poverty Line Families) lane kitu kiwa chah ktah naka Lockdown iwa da wanrah yei dooh ki wow kreh yow im ja ha waroh ki skur sorkar, ki skur wa yoh yarap naka sorkar, ki Deficit wa Deficit Pattern neibynta u bnai March, April wa u May, 2020.
Kani ka hukum da phah ko leh wow pynduna 50% yaka bai skur wa College neibynta ki khynnah wa wan naki manyung wa dooh (Below Poverty Line) wa ya kitu kiwa dooh kreh yow im ja heipor ka Lockdown kiwa lai puræ ha ki thaw wa ym em yoh yarap lane ki yong ki bru samen neibynta u April wa u May, 2020.
U Chief Secretary da pyntip u leh wa ym toh wow chim kiwon kiwon ki bai skur lait noh ka Tuition Fee ha waroh ki thaw puræ neibynta u bnai March, April wa u May, 2020 na waroh kiwa lai puræ wei lada em won kiwa da chim chwa yaka bai skur, toh u ya kheiñ noh ya kani kam chibynta yong ki bnai wow wan.
Ya kani ka hukum da pynmih hapoh ka aiñ Meghalaya School Education Act, Meghalaya Board of School Education, 1973 waka Meghalaya Private Universities (Regulation of Establishment and Maintenance of Standards) Act, 2012, deilang waki kyndon wa pynmih daka chnat Education Department kamjooh hapoh ka aiñ Disaster Management Act, 2005.
