Jowai: Ynne ka sngi, ka Meghalaya People United Front (MPUF), East Jaiñtia, da yoh ko wow pynbam smai næ pynkha sa kawi ka chnat krehkaam yong ka seiñ kawa kynthup ya ki manbei kawa tip kam ka Women’s Wing, ka wow krehkaam ha waroh kawi ka ri-loom Jaiñtia.
Ynne ka sngi ha chwa wow pynbaam smai ya kiwa kitkaam ka Women’s Wing da em ka yalang kawa da pynman ha yung sah yong u President ka seiñ u Kyrshan Blah, ha Khliehriat East, kawa da pynlai da u President ka Central Body u Aimon Syad. Da yoh ya ki ktien kyntu kynpham na u President warim ka seiñ u Dawanpoimi Laloo, i klam na u President Khliehriat u Kyrshan Blah, u Thanda Sana, u Hamwer Bhoi, Publicity Secretary wa naka Rosemary Dkhar President ka Women’s Wing.
Neiliang u President warim uwa man leh u uwa e buit ka seiñ, hawa e u yei klam da kyntu ya kini ki dkhot ka Women’s Wing wow kreh hok ya kiwon kiwon ki kaam neibynta ka jait bru, kamwa ka seiñ em ko ka yurim kawa skem nadooh wa seiñ ya ka wow kreh hok, da ong u leh ka seiñ da kreh ko wow yarap chiboon ki kaam neibynta ka jaitbru, da ong u leh ki manbei katni em ki ka kaam kawa hakhmat dooh neibynta ka imlang sahlang kamjooh leh wow yada ya ka jaitbru khian paaid.
Kiwa kitkaam yong ka Women’s Wing toh ka President ka Rosemary Dkhar, Vice President ka Dolma Siangshai, General Secretary ka Rika Siangshai, Assistant Secretary ka Ribait Shylla, Publicity Secretary ka Ribi Dkhar, Organising Secretary ka Junu Dhar deilang wa 20 ngut ki dkhot EC.
Ha kani ka jooh hi ka sngi, ka seiñ da yoh ko wow wai sa kawi ka Unit kaba kawa tip kam ka Laskein Block Unit.
Discussion about this post