Pynmih kyndon ka chnong Ialong ya kiwa lai bamdoh wa ya kiwa lai uiñke

Jowai: U waheh chnong ka Ialong, West Jaintia Hills District u Bishar Shylla ha ka khubor wa phah u da pyntip wa ka Dorbar Chnong Ialong hadien wa chong pyrkhat bha hajrong i wan yong ki bru lai bamdoh (Picnic) cha Madan Lyngkieng Pynthor Myntdu lyngba ka khyrdop (Gate) yong ka Ialong Park, kiwa lai wa wan khlem por. Hajrong ini i ka Dorbar Chnong Ialong yow lait na kiwon kiwon ki huri hura, da booh ko da i por ya kiwa lai bamdoh kamjooh ya kiwa lai ke cha Madan Lyngkieng wa ki toh u puræ bniah ki ya ka Signboard kawa da booh ha khmat yong ka Gate.

I por wow wai Gate yow hiar cha Madan Lyngkien Pynthor Myntdu toh nadooh 6 waje i step hadooh 8 waje i miet.

Ka Dorbar Chnong da maham ko ya kiwon kiwon ki kari wa wan uiñ na Madan Lyngkien palat ya i por 8 waje i miet wa ym wai de ya ka Gate wei lada em iwon iwon i chitom na ini, toh u phone cha ka Office ka Dorbar Chnong ha ki Number Phone kiwa da booh ha ka Signboard kawa em hajan yong ka Gate, ya kiwon kiwon wa pyrchah ya ki por wa da booh da ka Dorbar Chnong daw pynchitom ya ki katkam ka aiñ ka dorbar chnong.

Neiliang ka Dorbar chnong ka kyrpaad joor ya kiwa wan uiñke wa kiwa lai bamdoh wow ya krehlang waka dorbar chnong katkam ki kyndon kiwa da booh ha ka Signboard neibynta ka bha ka miat yow lait na iwon iwon i awri awra.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka Dorbar Chnong Ialong da pynbna ko leh wa da khang ya kiwon kiwon ki bru wow siat ya ki sim ki doh, kiwon kiwon ki mrad khloo wei kamjooh ya ki dohum kiwa em hapoh u pood u ang yong ka chnong Ialong wei lada chem ya kiwa leh pyrchah, ka chnong daw leh ko katkam ka aiñ chnong wei da e kti ya ki cha ka chnat Wild life ka sorkar.