Shillong: Kam chibynta wow khanglaad yei poor ka khlam COVID-19, u Secretary ka sorkar Meghalaya, Health and Family Welfare da pynmih hukum u ynne ka sngi wa da emkaam wow booh ki kyndon wow bood kiwa yah Truck kamjooh kiwa yarap yaki kiwa psiah chapoh ka jylla kiwa kit yaki mar wa emkaam (Essential Commodities).
Kani ka hukum da ong ko wa ki Truck toh u siat dawai (Disinfect) yaki haki thaw psiah chapoh ka jylla (Entry Point), wei ha kini ki Entry Point, kiwa yah deilang wa kiwa yarap yaki daw sylli bniah yaki (Scanned) wei toh u e yaki da ki Mask waki Hand Sanitizer. I chim pyrtuid (Registration) toh u leh ha kini ki Entry Point deiwa e yei pyrtuid wa pura, i thaw sah, ki phone number, ki thaw wa da lai da wan ki ha ki 14 sngi wa da dep, lada em ki i iñ doh, kyoh wa i chitom wow riñ mynsien.
Ka hukum da ong ko leh wa kiwa yah kamjooh kiwa yarap yaki toh u khana bniah ki yei daw wa psiah ki chapoh ka jylla kamjooh i thaw wow lai ki wei ka tarik wow liwan ki. Hap khynna leh ya i pyrtuid, thaw sah, phone number u tre lane ka Agency.
Kiwa yah kamjooh kiwa yarap toh u rah ki dei ja song neidaw wym chah u sangeh ki cha luti lait noh em wa jia wym hoi de u dam u sangeh. Ym chah u mih ki napoh kari lait noh heipor wa mih ki yow lai paikhana kiwa em ha ki Petrol Pump wei ki Petrol Pump leh toh u pyntikna ki wa ki paikhana yong ki toh u man ki kiwa khooid deiwa pynbiang yaka um wei toh u booh leh ya u Bleaching Powder yow pynkhooid.
Kiwa yah kari kamjooh kiwa yarap yaki toh u sah miet ki haki thaw wa da tipmit daka sorkar wei wow pyntip leh ya ini. Hawa pynhiar won yaki mar toh u pynemkaam du da ki bru kiwa da em chwa ha i thaw wa pynhiar mar, u man kiwa lehkhooid khamtam ki kti, u bood yaki kyndon manda kyoh wei wow bood yaka Social Distancing namo ya jngai uwi na uwi.
Ya kini ki kyndon toh u pynmih leh hei dur ki kot lakdop iwa thoh ha i ktien Hindi wa Khasi kiwa toh u saam cha kiwa em hapoh ka truck yow pynkynmoo yaki.
Discussion about this post