Ki phra tylli ki seiñbhalang kiwa kynthup ya ka All Jaintia Hills Social Welfare Organization (AJHSWO), Jaintia Contractor & Supplier Association (JCSA), Jaintia National People Organization (JNPO), All Hynniewtrep People United Front (AHPUF), All Meghalaya People Organization (AMPO), Niaw Wasa Youth Federation (NWYF), Society for Environment Protection and Sustainable Development (SEPSD) wa ka Fight Against Corruption Team (FACT). Haka 16 tarik uni u bnai da lai ki wow e dorkhat ha u Prestone Tynsong u montri ka chnat PWD (Road) yong ka sorkar jylla wow pynsñiaw hajrong i wym sñiaw yahap wow kyrriah ya ka yung krehkaam ka PWD (R) Jowai North Division cha ka chnong Shangpung, West Jaiñtia Hills.
Ha ka kyrwoh naki 8 seiñ, da ong wa i thmu yong ki wow pynsangeh ya i kyrriah ya katai ka yung krehkaam ym toh wow pynyachruit næ wow pynyoo bor, toh haka yurim wa ym sñiaw yahap ya kawa em haka District Head Quarter wow rah cha i thaw wa jngai da ki phaw Kilometer, neibhah kamwa da tip wa katai ka yung krehkaam da e ko ya i chakri ya u paidbah ka Ri-loom Jaiñtia nadooh wa da yoh yaka District wa pura wei ym jooh em iwon iwon i ujor wa katai ka yung krehkaam tkoh i krehkaam yong ka.
Heiyatoh won wa em wa ong wa katai ka Division da e chakri ko du yaki chnong kiwa haap hapoh ka Laskein C&RD Block, ki 8 seiñ da ong ki wa ini toh iwa bakla neibhah wa da tip che wa dang boon ki chnong kiwa haap hapoh ka Thadlaskein C&RD Block leh, kiwa haap hapoh i pait katai ka Division wei kini ar tylli ki Block leh em ki yaka jooh ka District Head Quarter.
Hajrong kitai ki yurim, ki phra seiñ da dawa joor ki naka sorkar jylla wa ym toh wow kyrriah ya katai ka Division wei wow chna noh daka Division kawa thymme haka chnong Shangpung neibhah wa da em chwa ko yaka Sub-Division Office da slem, deiwa pynrap leh wa lada ka sorkar ka thrang ko yaka roi ka paar, ym toh wow leh kaam Politics ya kawon kawon ka kaam wei toh u leh deiwa yoh myntoi khnang wa ym em i leh chiliang ha kiwon kiwon ki bynta wei ym toh u pynhun du ya ki bru næ ki Montri sorkar du neibynta i myntoi san snem tangwa ya kiwa boon wa lang leh kamjooh, pynkut ka kyrwoh naki phra seiñ.
