Ha ka 2 tarik uni u bnai, da yoh yutip da ki pulit ka Nongstion Police Station wa em ki bru deilang wa ki dkhot ka VDP da kem ki ya uwi u bru wa pyrchang wow tooh ya ki tiar tem sur napoh kawi ka kari wa pynyieñ hajan ka yung krehkaam u DTO, Nongstion.
Neiliang ki pulit da lai hiar ki wut wut cha ini i thaw heiwa da rah ya u bru wei da pynngat ya oo hapoh ki kyndon ka aiñ.
Tangwa chwa wow poi ki pulit, da em chwa wa riñ dur (Video) ya uwa yoh kem da ki VDP iwa da pynpoor ha ki Social Media heiwa da pynchitom ya oo deiwa dat da u dieñ ya ki kti yong oo deiwa phah pynchah ya waroh ar ki kti u.
Neiliang ki pulit da ong ki wa ini i chim ya ka aiñ ha kti da wanrah ko wow pynngat ha ka aiñ ya kiwa emkti ha ini wow pynchitom ya uni uwa chah pynbaad wa tooh wei ki kyndon wa da tyngkheiñ toh deiwa ksoh yabor ya u bru wei wow pynchitom ya oo.
Ka takit hajrong waroh ar kini ki kaam da lai ko chakhmat heiwa hadien wa da phah lai pait ya uwa chah dat, ki Doctor da chem ki wa da mynsoo u malum mala.
