Ka 4 tarik u Kmaichonglad (Dec) man ko leh kam ka Navy Day kawa da lehkmen yow kynmoo ya ki kaam wa da leh da ka Indian Navy hapoh ka ri wei da jied ya ka 4 tarik neidaw wa ha kani ka sngi ha u 1971 heipor wa leh ya ka Operation Trident heipor ka thma Indo-Pakistan, ka Indian Navy da yoh ko wow pynngam ya soo tylli jhaad ka Pakistan wa kynthup ya ka PNS Khaibar.
Ha kani ka sngi da kynmoo warom leh ya kitu kiwa da dooh yei mynsien yong ki.
Neiliang ka Western Naval Command ha Naval Dockyard da sai ko yow pynyoo-rong da ka lama ri wa heh dooh hajan ka Gateway of India. Kani ka lama toh kawa jrong 225 phut cha chrooh wa 150 phut cha neiñ wei khia ko 1400 Kg.
Neiliang won u Prime Minister ka ri, u Narendra Modi da e khublei u ya ki chipai ka Indian Navy deiwa ong, “Ka Navy yong i toh kawa da naam yei man ryntih wei kiwa chlur. Ka Navy yong i toh kawa em hakhmat wow yarap ha iwon iwon i kaam wa ha ki por wa pynyoo ka bei rymaw yei bor.
