Katwa dang pteiñ i yakhun pyrchah ya ka khlam u COVID-19 hapoh ka ri hapyrdi wa em ka Lockdown, ki chipai suiñ ka ri namo ka Indian Air Force (IAF) da wan ko chaphrang hei wow pyntikna wa ka yakhun man ko kawa lai bait wei ka wow jop deiwa pynpoi ko ya ki tiar sumaar wa ha rukom cha ki jylla ka ri.
Ynnin ka sngi u montri rangbah ka Manipur, u Biren Singh da pyntip u wa kawi ka lieñsuiñ IL-76 yong ka IAF da poi ko ha Bir Tikendrajit International Airport, Imphal heiwa da wanrah ko hadooh 14 ton ki dawai, ki PPE, mask, sap-kti, wa kiwi kiwi.
Neiliang won u montri rangbah ka Nagaland, u Neiphiu Rio da pyntip u wa da ka IAF pynpoi chooh chooh ko ya ki tiar yaleh chapoh ka jylla wow yarap ya i yakhun pyrchah ya kani ka khlam.
Chooh chooh u montri ka chnat Civil Aviation ka sorkar pyrdi, u Hardeep Singh Puri da ekhublei u ya waroh kiwa embynta ha kani ka Mission Lifeline Udan nadooh ki Company ki lieñsuiñ samen wa ki IAF wa da pynpoi ki ya ki tiar yaleh cha waroh ki jylla.
Da ong u wa da em 109 tylli ki lieñsuiñ kiwa da hær 100,000 km wow kit hadooh 139 ton ki dawai ya ki tiar wow yakhun pyrchah ya u COVID-19 ha kylleiñ ka ri India.
Discussion about this post