Ka leh niam Behdieñkhlam yong ka Seiñ Raij Mukhla da poi ko ynne ka sngi cha ka sngi wa ar wei ha kani ka sngi ki khon khynroo ka Seiñ Raij Mukhla da mih ki dang step na yung yow lai pam ya ki artylli ki Dieñkhlam na khloo yow wanrah ya ki cha ka madan ryngkaw wow pynyieñ ya ki.
Ha i por 12:00 waje pyrdi sngi hadien wa da wan pam ya kini ki Dieñkhlam na khloo, da pyntip cha ki khon ka Raij yow lai rah ya ki. Heipor 1:00 waje i sngi ki khon khynroo ka Seiñ Raij Mukhla hei yahkhmat yong u Pa Langdoh wa ki Waheh Sankur da lai yow wanrah ya kini ki Dieñkhlam na khoo.
Ya uwi u Dieñkhlam uwa khian dooh da rah ya oo na khloo wei da booh ya oo ha madam tih kyndaw ha Wahchnong uwa man leh u Khnong Blai, katwa ya uwa heh won da rah ya oo wei da booh ya oo ha Madam Ryngkaw ha madan Slot Masi wei mynstep daw wanrah sa uwi won u Dieñkhlam na chnong Umlangshor kiwa man ki Chong Bri wei ya kini ki le tylli ki Dieñkhlam daw pynyieñ mynstep ka sngi Musiang kawa man ka sngi kawa le yong ka leh niam ya ka Behhdieñkhlam.
Kamtæ hadien wa da dep wow wanrah ya kini ki ar tylli ki Dieñkhlam ynne na khloo, heipor 03:00 waje noh chariñ ka sngi da yoh wow chong ya ka Dorbar Niam kawa pynlai da u Pa Langdoh deilang wa ki Waheh Sankur hei emlang ki khon khynroo wa ki rangbah ka Seiñ Raij Mukhla yow yoh wow yaklam ya pynbait ya ki kaam neibynta ka sngi Musiang kiwa ki khon ka Seiñ Raij Mukhla hap ki wow pyndep.
Ya ini waroh da leh deiwa bood ya ki kyndon wa da booh da ka sorkar jylla.
Ini man ko katkam i pynlait khubor na u Standbyme Sari uwa man uwi na ki Waheh Sankur ka kur Sari.
