Ki bor pait bor pynlai ka Thomas Jones Synod College, Jowai ynnin ka 6 tarik da pyndep ki yei pynpsiah dkhot ya ki khynnah puræ kiwa em i thmu wow embynta wa ka Bharat Scouts & Guides Movement.
Ha ka yalang wa tbian wa pynlai da ka Siami Shylla, Guide Captain MBS&G, West Jaiñtia Hills da emlang leh u Dr. D.G. Lyngdoh, Principal TJSC wa ka Dr. I. Dkhar, Vice-Principal TJSC deilang u W.R. Lyngdoh, State Secretary MBS&G, State Headquarter Shillong wa ka S. Tariang, Vice-President MBS&G-WJHD.
Ha kani ka sngi chwa wow pyndep ya ka Investiture Ceremony yong ki Rovers-Rangers da pynpsiah dkhot leh ya u Principal wa ya ka Vice-Principal yong ka Thomas Jones Synod College.
Ya kani ka Investiture Ceremony da pyndep katkam ki rukom yong ka Scouts- Guides Movement heiwa u Ohiwot Laloo kam u Scouts Master da pyndep u ya ki chynrang watip kam ki Rovers katwa ka Rosie Bang, Rangers Leader da chimkti ko wow pyndep ya ki kynthai watip kam ki Rangers.
U Principal ka Thomas Jones Synod College da kitbok kitrwiang wei e mynsien u ya ki Rovers-Rangers deiwa ong kam wa ka thong yong phi toh wow e i chakri wa miat wa bha ya ka imlang sahlang toh leh yei wabha tam neibynta i burom yong phi kamjooh yei burom ka College waroh kawi.
U W.R. Lyngdoh hawa e kyntien da khana pynsñiaw u yei parom wa tbian ka Scouts-Guides Movement neitæ booh pachat u leh ki kyntien sneiñ kyntien kroo ya ki Rovers-Rangers.
